हेटौंडाः बागमती प्रदेश प्रहरी कार्यालयले प्रहरी निरीक्षक योगेन्द्र तिमिल्सिनालाई असोज महिनाको उत्कृष्ट प्रहरी घोषित गरेको छ । बागमती प्रदेश प्रहरी कार्यालयले मातहतका प्रहरीलाई प्रोत्साहित गर्न हरेक इकाईलाई मासिक रुपमा कार्यसम्पादनका आधारमा एकजनालाई उत्कृष्ट प्रहरी घोषणा गर्न निर्देशन दिनुका साथै कार्यालयले हरेक महिना एकजनालाई प्रदेशकै उत्कृष्ट प्रहरी घोषणा गर्ने गरेको छ ।
असोज महिनाको उत्कृष्ट प्रदेश प्रहरी घोषित तिमिल्सिना काभ्रे जिल्लास्थित इलाका प्रहरी कार्यालय बनेपामा कार्यरत हुनुहुन्छ । असोज महिनामा ९ जना फरार प्रतिवादीहरुलाई पक्राउ गरेको, लागूऔषधसहित मानिस पक्राउ गर्नुका साथै डलर साट्ने बहानामा ठगी गर्ने समूहलाई पक्राउ गरी कानुनी कारबाहीको दायरामा ल्याएकाले तिमिल्सिनालाई उत्कृष्ट प्रहरी घोषित गरिएको बागमती प्रदेश प्रहरी कार्यालयले जनाएको छ । उत्कृष्ट प्रहरी घोषित तिमिल्सिनालाई बागमती प्रदेश प्रहरी कार्यालयले नगदसहित पुरस्कृत गरेको छ ।
