हेटौंडाः हेटौंडा औद्योगिक क्षेत्रस्थित एक साबुन उद्योगमा आज बिहान आगलागी भएको छ । महाशक्ति शोप कम्पनिको गोदाममा आगलागी भएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ । रानाका अनुसार उद्योगको कार्टुन गोदाममा इलेक्ट्रिक सर्ट भई आगलागी भएको बताइएको छ ।
आगलागीबाट उद्योगको गोदाममा रहेको कार्टुन, केमिकल र र्यापर जलेर ५० लाख रुपैयाँ बराबरको क्षति भएको अनुमान गरिएको छ । बिहान ७ बजेको समयमा आगलागी भएको थियो । नेपाल प्रहरी, औद्योगिक सुरक्षामा खटिएका सशस्त्र प्रहरी बल, बारुणयन्त्रको टिमले ८ बजे आगो नियन्त्रणमा लिएको ईलाका प्रहरी कार्यालय पशुपति नगरका ईन्चार्ज प्रहरी निरीक्षक देवराज काफ्लेले जानकारी दिनुभएको छ । उहाँका अनुसार आगलागी समयमै नियन्त्रणमा लिएकाले ठूलो क्षति हुनबाट जोगिएको छ ।
