हेटौँडाः लागूऔषध गाँजासहित ४ जनालाई मकवानपुर प्रहरीले पक्राउ गरेको छ । उनीहरुले बोकेको झोलामा ४२ किलो ५०० ग्राम लागूऔषध गाँजा फेला परेको प्रहरीले जनाएको छ । प्रहरीले मकवानपुर जिल्ला अदालतबाट १२ दिनको म्याद अनुमति लिई थप अनुसन्धान कार्य गरिरहेको जनाएको छ ।
बुधबार बिहान ८ बजेर ४५ मिनेटको समयमा पूर्व–पश्चिम राजमार्गअन्तर्गत हेटौँडा–१५, रातोमाटेस्थित प्रहरी चेकपोष्टमा हेटौँडाबाट बीरगन्जतर्फ जाँदै गरेको बा ३ ख ८३८२ नम्बरको यात्रुवाहक बसमा सवार चितवन जिल्लाको कालिका नगरपालिका–११ का ३२ वर्षीय दिनेश चेपाङ, २२ वर्षीय प्रशान्त प्रजा, ४१ वर्षीय रेशम प्रजा र ४१ वर्षीय दीपलाल प्रजालाई गाँजासहित पक्राउ गरिएको प्रहरीले जनाएको छ ।
