हेटौँडाः पूर्व–पश्चिम राजमार्गअन्तर्गत हेटौंडा–१९, सान्नानिटारमा यात्रुबाहक बस अनियन्त्रित भई बोलेरो पिकअप गाडसिँग ठोक्किएर दुर्घटना हुँदा ११ जना घाइते भएका छन् ।
मंगलबार वीरगंजबाट धनगढीतर्फ जाँदै गरेको सुदुरपश्चिम प्रदेश ०१–००१ ख ३२२९ नम्बरको यात्रुबाहक बसको पट्टा भाँच्चिएर अनियन्त्रित भई मनहरीबाट हेटौँडातर्फ आउँदै गरेको ना ४ च २९३२ नम्बरको बलेरो पिकअप गाडीमा ठोक्किएर दुर्घटना भएको थियो । बसमा सवार रहेका २३ जना यात्रुमध्ये ११ जना सामान्य घाइते भएको जिल्ला प्रहरी कार्यालय मकवानपुरले जनाएको छ । घाइतेहरुको चुरेहिल अस्पतालमा उपचार भइरहेको छ ।
घाईते हुनेमा चितवनको माडी नगरपालिका–५ का ३१ वर्षीय यम बहादुर दरै, हेटौँडा–११, नवलपुरकी २१ वर्षीया रमा सापकोटा, हेटौँडा–१९, नेवारपानीकी ३२ वर्षीया बिमला श्रेष्ठ, २९ वर्षीया कल्पना श्रेष्ठ, ३४ वर्षीय सुशील श्रेष्ठ, बारा जिल्लाको जितपुर–सिमरा उपमहानगरपालिका–२ का २७ वर्षीय जीवन लामा, कलैया उपमहानगरपालिका–२६, महेसपुरकी ३० वर्षीया मञ्जुदेवी कपाली, मन्जुदेवीका ३ वर्षीय छोरा नितेश कपाली, भारतको बिहार राज्यको पश्चिम चम्पारन–१३ का ४५ वर्षीय हिरालाल शर्मा, बसचालक कैलाली जिल्लाको धनगढी उपमहानगरपालिका–१३ का ३८ वर्षीय मौली राना र सहचालक २४ वर्षीय अविशेक शर्मा घाइते भएका छन् । दुर्घटनामा घाइते हुनेहरुको टाउको र हातमा सामान्य चोट लागेको प्रहरीले जनाएको छ । बोलेरो चालक भने सकुसल छन् ।
