हेटौंडाः मकवानपुर प्रहरीले मनहरी गाउँपालिकाबाट १ किलो ८ सय ग्राम लागुऔषध अफिम जस्तो देखिने पदार्थसहित एक जना बालकलाई पक्राउ गरेको छ । बुधबार ५ बजेको समयमा विशेष सुचनाको आधारमा ईलाका प्रहरी कार्यालय मनहरी र प्रहरी चौकी सुनाचुरीबाट खटिएको प्रहरी टोलीले लागुऔषध अफिम जस्तो देखिने पदार्थसहित राक्सीराङ–४ का एक बालकलाई पक्राउ गरेको जिल्ला प्रहरी कार्यालय मकवानपुरका निमित्त प्रहरी प्रवक्ता प्रहरी निरिक्षक रामचन्द्र घिमिरेले जानकारी दिनुभयो ।
मनहरी–६ लोथरस्थित पुर्व–पश्चिम सडकखण्डमा शंकास्पद रुपमा हिँडिरहेका बेलामा प्रहरीले बालकलाई लागुऔषधसहित पक्राउ गरिएको जनाएको छ । प्रहरीले बालकले हातमा बोकेको कपडाको झोला सुरक्षाजाँच गर्दा उक्त झोला भित्र लुकाइछिपाई ल्याएको अवस्थामा लागुऔषध अफिम जस्तो देखिने पदार्थ फेला पारेर बरामद गरेको हो । उक्त लागुऔषधसहित बालकलाई नियन्त्रणमा लिई थप अनुसन्धान गरिरहेको निमित्त प्रहरी प्रवक्ता घिमिरेले बताउनुभयो ।
