हेटौंडाः हेटौंडा–१७, हटियास्थित दीपक पौडेलको घर र देवराज अधिकारीको घरमा चोरी गर्ने दुईजनालाई गरगहना र चोरी भएको सामानसहित प्रहरीले पक्राउ गरेको छ । साउन २३ गते बिहान साढे ११ बजे पौडेलको घरबाट टिभि चोरी भएको थियो भने दिउँसो १ बजे अधिकारीको घरबाट सुनको गरगहना चोरी भएको थियो ।
चोरी भएको घटनामा अनुसन्धान गरी प्रहरीले चोरीमा संलग्न हेटौंडा–४ बस्ने २२ बर्षीय राजु मानन्धर र भिमफेदी गाउँपालिका–४ का ३३ बर्षीय देव श्रेष्ठलाई पक्राउ गरेको छ । पक्राउ परेका दुबैजनालाई जिल्ला अदालत मकवानपुरबाट म्याद लिई हिरासतमा राखेर अनुसन्धान गरिरहेको प्रहरीले जनाएको छ ।
चोरीको घटनामा संलग्न हेटौंडा–४, कर्राका २८ बर्षीय मिलन मोक्तानलाई पनि पक्राउ गरिएको प्रहरीले जनाएको छ । देवराज अधिकारीको घरबाट चोरी गरेको सुनको गरगहना मकवानपुरको मनहरी गाउँपालिका–६, सुनाचुरी जंगलमा जमिनमुनी गाडेर राखेको अवस्थामा बरामद गरिएको जिल्ला प्रहरी कार्यालय मकवानपुरले जनाएको छ । घटनाको सम्बन्धमा प्रहरीले थप अनुसन्धान गरिरहेको छ ।
