हेटौंडाः चितवनको राप्ति नगरपालिकामा जारी रसौली फुटबल कपमा मकवानपुरको हेटौंडा फुटबल एकेडेमीले विजयी सुरुवात गरेको छ । सोमबार भएको आफ्नो पहिलो खेलमा हेटौंडा फुटबल एकेडेमीले विजयी सुरुवात गरेको एकेडेमीका अध्यक्ष तथा प्रशिक्षक भीम लामाले जानकारी दिनुभयो ।
नकआउट चरणमा भइरहेको प्रतियोगिताअन्तर्गत् हेटौंडा फुटबल एकेडेमीले बुधबार क्वाटरफाइनलको खेलमा आयोजक रसौली क्लबसँग भिड्ने प्रशिक्षक लामाले बताउनुभयो । अहिले जिल्लामा कुनै पनि गोल्डकप हुन नसकिरहेको अवस्थामा जिल्लाका विभिन्न स्थानीय तहका खेलाडीहरुलाई आफूले प्रशिक्षण गराएर टिम बनाई रसौली गोल्डकपमा सहभागी गराएकोे उहाँले बताउनुभयो । प्रशिक्षक लामाले आफ्नै लगानीमा खेलाडीहरुको यातायात र बसाई खर्च व्यवस्था गरेर खेलाडीलाई गोल्डकपमा सहभागी गराएको जानकारी दिनुभयो ।
