हेटौंडाः लायन्स क्लब अफ मकवानपुर हेडम्बाको अध्यक्षमा रमिला घलान चयन हुनु भएको छ । क्लबको पहिलो महिला नेतृत्वको रुपमा रमिला घलानलाई अध्यक्षमा चयन गरिएको छ ।
लायन्स क्लब अफ मकवानपुर हेडम्बाका अध्यक्ष सुधीर दाहालको अध्यक्षतामा आइतबार भएको कार्यक्रममा रमिला घलानलाई अध्यक्षको जिम्मेवारी हस्तान्तरण गरिएको छ । दाहालले स्वागत मन्तव्य राख्नुहुँदै देश कोभिडले विकराल रुप लिएको अवस्थामा आफू स्वास्थ्यकर्मी रहेकोले सचेतना कार्यक्रम गरिए पनि जति हुनुपर्ने त्यो हुन नसकेको बताउनुभयो । आफूले योजना बनाएका अपुरा कामलाई निरन्तरता साथै थप कार्यक्रम नयाँ कार्यसमितिले सफलतापूर्वक गर्नेमा आफू विश्वास्त रहेको दाहालले बताउनुभयो ।
लायन्स क्लब इन्टरनेशनल ३२५ बी २ का निवर्तमान डिस्ट्रिक्ट गभर्नर शम्भु नकर्मीको प्रमुख आतिथ्यमा कार्यक्रम भएको थियो । लायन्स क्लब अफ मकवानपुर हेडम्बाले समाजका लागि योगदान गरेको पनि उहाँले बताउनुभयो । आफूले सक्दो साथ र सहयोग गरिने प्रतिबद्धतासहित नयाँ कार्यसमितिले थप काम गरी हेडम्बालाई उच्च राखिने बताउनुभयो । कार्यक्रममा लायन्स अभियानका पदाधिकारीहरुको उपस्थिति रहेको थियो ।
