हेटौंडाः मकवानपुर प्रहरीले स्कार्पियो जीपमा लुकाईछिपाई ल्याइएको ६५ केजी लागूऔषध गाँजा बरामद गरेको छ । बिहीबार दिउँसो १२ बजे मनहरीबाट हेटौंडातर्फ आउँदै गरेको बा ११ च ९५०९ नम्बरको स्कार्पियो जीपलाई हेटौंडा–१९ नेवारपानीस्थित सडकखण्डमा प्रहरीले सुरक्षाजाँच गर्दा ६५ केजी गाँजा बरामद गरेको हो ।
प्रहरीले लागूऔषध गाँजासहित २ जनालाई पक्राउ गरेको छ । पक्राउ पर्नेमा स्कार्पियो चालक चितवन जिल्लाको भरतपुर महानगरपालिका–२० का ३८ वर्षीय रोशन परियार र गाडीमा सवार मकवानपुर जिल्लाकोे मनहरी गाउँपालिका–६ का ४३ वर्षीय ललित तामाङ रहेको जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक जयश्वर रिमालले जानकारी दिनुभयो । उहाँका अनुसार पक्राउ परेका २ जनासहित, गाँजा र स्कार्पियो जीप नियन्त्रणमा लिई थप अनुसन्धान भइरहेको छ ।
