हेटौंडाः जेसीआई हेटौंडाको जेसीज सप्ताह २०२० अन्तर्गत अनलाईन ‘खुला गजल वाचन प्रतियोगिता’ मा नुवाकोटका गजलकार गोपाल खनाल प्रथम भएका छन् । त्यसैगरी प्रतियोगितामा मकवानपुरका केशव समर्पण द्वितीय, मकवानपुरका गंगा सापकोटा र बागलुङका मनिष गौतम तृतीय भएका छन् ।
जेसीज सप्ताह २०२० अन्तर्गत बुधबार पाँचौं दिन खुल्ला गजल प्रतियोगिताको आयोजना गरिएको हो । प्रतियोगितामा ४४ जनाले सहभागिता जनाएका थिए । प्रतियोगितामा रुकुम, नुवाकोट, चितवन, धादिङ, पोखरा, काठमाडौं, भक्तपुर, लम्जुङ र युएईबाट पनि गजलकारहरुले सहभागिता जनाएका थिए । जेसीआई हेटौंडाका २०२० का अध्यक्ष राजदेव बनियाँको अध्यक्षतामा भएको कार्यक्रममा पोखराबाट वरिष्ठ साहित्यकार प्रकट पगेनीको प्रमुख आतिथ्य रहेको थियो । त्यस्तै नेपाल जेसीज क्षेत्र ‘ख’ निरुपित राष्ट्रिय उपाध्यक्ष विशाल थापाको पनि आतिथ्य रहेको थियो । खुल्ला गजल वाचन प्रतियोगिताको निर्णायकमा साहित्य संगम मकवानपुरका अध्यक्ष निमेष निखिल रहनुभएको थियो भने निर्णायकमा गजल मञ्च मकवानपुरका अध्यक्ष देवराज तिवारी र गजलकार बबि थापा रहनुभएको थियो ।
कोरोना भाइरस सङ्क्रमण जोखिमका कारण यस वर्ष जेसीआई हेटौंडाले जेसीज सप्ताहका समपूर्ण कार्यक्रमहरु भर्चुअल माध्यमबाट गरिरहेको छ । जेसीज सप्ताह अन्तर्गत आज बिहीबार छैठौं दिन ‘माइण्ड टेस्ट ट्रेनिङ’ हुने तालिका रहेको जेसीआई हेटौंडाका कार्यकारिणी उपाध्यक्ष लिसेन बस्नेतले जानकारी दिनुभयो । सप्ताहव्यापी कार्यक्रम अन्तर्गत मंगलबार ‘समृद्धिका लागिः व्यक्ति कि पद्दति’ भन्ने विषयमा अन्तर जेसीज वादविवाद प्रतियोगिता भएको थियो । जेसीज हेटौंडाको जेसीज सप्ताह २०२० अन्तर्गत भोलि शुक्रबार अन्तिम दिन वक्तृत्वकला प्रतियोगिता गरिने भएको छ । लकडाउनको समयमा गरिएको १० वटा वक्तृत्वकला प्रतियोगिताका प्रथमहरुले सो प्रतियोगितामा भाग लिने छन् ।
