हेटौँडा : आगामी प्रतिनिधि सभा सदस्य निर्वाचनका लागि नेपाली कांग्रेसका तर्फबाट समानुपातिक तर्फको उम्मेदवारको बन्द सूची सार्वजनिक गरिएको छ । निर्वाचन आयोगमा पेश गरिएको कांग्रेसका समानुपातिक तर्फको उम्मेदवाहरुको विवरण सार्वजनिक गरिएको हो ।
कांग्रसले आयोगमा बुझाएको समानुपातिकतर्फको बन्द सूचीमा समावेश ११० जना उम्मेदवारको मध्ये बागमती प्रदेशका २१ जना रहेका छन् । कांग्रेसको समानुपातिक सूचीमा आदिवासी जनजाती क्लस्टरमा १४ जना, खस आर्य क्लस्टरमा ४ र दलित क्लस्टरमा ३ जना रहेका छन् ।
कांग्रेसले आदिवासी जनजाति क्लस्टरमा काठमाडौंबाट गोपालमान सिंह राजभण्डारी, नारायण श्रेष्ठ रहेका छन् भने भक्तपुरबाट विनोद प्रकाश कायस्थ, मदनकृष्ण श्रेष्ठ (अपांगता भएको), डा. गंगालक्ष्मी अवाललाई उम्मेदवार बनाएको छ । कांग्रेसले नुवाकोटबाट महेन्द्र थिङ तामाङ, जगतबहादुर तामाङ, सिन्धुपाल्चोकबाट प्रेमध्वज लामा, धादिङबाट सेतेमान तामाङ, शान्ता कुमारी तामाङ, रसुवाबाट पेम्वा छिरिङ तामाङ, दोलखाबाट छिरिङ डोल्मा शेर्पा, चितवनबाट कमला श्रेष्ठ र मकवानपुरबाट शर्मिला श्रेष्ठ उम्मेदवार रहेका छन् ।
कांग्रेसले दलित क्लस्टरमा उम्मेदवार बनाएको ३ जना मध्ये काठमाडौँबाट हरिशरण नेपाली, मकवानपुरबाट पवित्रा विक काभ्रेबाट मीरा कुमारी नेपाली उम्मेदवार रहेका छन् । ४ जना खस आर्य क्लस्टरका उम्मेदवार मध्ये नुवाकोटबाट अर्जुननरसिंह केसी, सिन्धुली नरेन्द्रजंग थापा, काठमाडौँबाट श्रीविनोद भट्टराई र धादिङबाट सीता थपलिया रहेका छन् ।
