हेटौँडा : नेपाली कांग्रेस बागमती प्रदेश सभाको संसदीय दलको नेता इन्द्रबहादुर बानियाँले आफू दलको नेता भएको जानकारी प्रदेश प्रमुख दीपकप्रसाद देवकोटालाई जानकारी गराउनुभएको छ । उहाँले बुधबार हेटौँडास्थित प्रदेश प्रमुखको कार्यालयमा पुगेर आफू दल नेता चुनिएको पत्र प्रदेश प्रमुख देवकोटालाई बुझाउनुभएको हो ।
नेता बानियाँले बुधबार सम्पन्न निर्वाचनमा कुल ३५ मतमध्ये २२ मत प्राप्त गर्नुहुँदै संसदीय दलको नेता पदमा निर्वाचित हुनुभएको थियो । कांग्रेस संसदीय दलको विधान २०७९ को धारा ५ को उपधारा (२) बमोजिम निर्वाचन गरिएको उक्त प्रक्रियामा बानियाँले कुल सदस्य संख्याको ५० प्रतिशतभन्दा बढी मत प्राप्त गरेपछि दलको नेता चयन हुनुभएको हो ।
मुख्यमन्त्री बहादुर सिंह लामाले सरकार विस्तारको तयारी गर्नुभएसँगै नेता बानियाँले प्रदेश प्रमुख देवकोटालाई पत्र बुझाउनुभएको हो । कांग्रेस संसदीय अभ्यास अनुसार दलका नेता नै मुख्यमन्त्री हुने प्रक्रिया रहेकाले नेता बानियाँले प्रदेश प्रमुख देवकोटालाई भेट्नु भएको बताइएको छ । मुख्यमन्त्री लामाले आफुले गठबन्धनको सरकारको नेतृत्व गरेकाले तत्काल राजिनामा दिन नपर्ने बताउँदै मन्त्री परिषद् विस्तार गर्नुभएको छ । मुख्यमन्त्री लामाको सिफारिसअनुसार प्रदेश प्रमुखको कार्यालयले बिहीबार दिउँसो १ बजे ३ जना मन्त्रीको सपथ ग्रहण कार्यक्रम राखिएको छ ।
