हेटौंडाः बागमती प्रदेश सरकारले चालु आर्थिक वर्ष २०७७\०७८ मा प्रदेशभर १ सय २७ वटा सडक पुल निर्माणका लागि बजेट विनियोजन गरेको छ । प्रदेश सरकारले प्रदेश भित्रका बहुवर्षीय योजना अन्तर्गतको सडक पुल निर्माण योजनाहरुमा ४० वटा सडक पुल चालु आर्थिक वर्षमा सम्पन्न गर्ने लक्ष्य लिएको छ । बागमती प्रदेश सरकारले गत वर्ष ३२ वटा सडक पुलहरु निर्माण सम्पन्न गरेर प्रदेशका मुख्यमन्त्री डोरमणि पौडेलले एकैसाथ उद्घाटन गर्नुभएको थियो । प्रदेशका २२ वटा सडक पुल भने गत वर्षबाटै निर्माणाधीन रहेको बागमती प्रदेश भौतिक पूर्वाधार विकास मन्त्रालय अन्तर्गत सडक महाशाखाका प्रमुख नविन कुमार सिंहले जानकारी दिनुभयो ।
बागमती प्रदेश सरकारले केन्द्रबाट आएको सशर्त अनुदान तर्फको ३६ करोड ५७ लाख बजेटबाट प्रदेशको ५७ वटा सडक पुल निर्माणका लागि बजेट विनियोजन गरेको छ । जसमा मकवानपुर जिल्लाको १० वटा सडक पुलहरु निर्माण हुने भएका छन् । मकवानपुरको मकवानपुरगढी गाउँपालिका-५ को ज्यामिरे खोलामा सडक पुल निर्माणका लागि ५० लाख रुपैयाँ बजेट विनियोजन गरेको छ । हेटौंडा उपमहानगरपालिकाको कुखरेनी खोलामा सडक पुल निर्माणका लागि ६२ लाख ५० हजार, मकवानपुरकै आँपखोल्सी सडक पुलका लागि १० लाख, मकवानपुरगढी गाउँपालिकाको सिमलीटार पुलका लागि १ करोड ३५ लाख, कैलाश गाउँपालिकाको कालीखोला सडक पुलका लागि १५ लाख, थाहा नगरपालिकाको दामन–डाँडाबास सडकखण्डमा पर्ने भुग्देल खोला पुल निर्माणका लागि ८० लाख रुपैयाँ बजेट विनियोजन भएको छ ।
त्यस्तै बागमती प्रदेश भौतिक पूर्वाधार विकास मन्त्रालय अन्तर्गत यातायात पूर्वाधार विकास निर्देशनालयले दिएको जानकारी अनुसार मकवानपुरको कालिकाटार–चुनियाँ-नामटार सडकखण्डमा पर्ने कालिखोला पुलका लागि १ करोड, हेटौंडा उपमहानगरपालिकाको साविकको वडा नम्बर २० र २२ जोड्ने कर्राखोला पुलका लागि ५० लाख, ईन्द्रसरोवर गाउँपालिकाको कुलेखानी–एकान्तकुना–सुलिकोट सडकमा पर्ने सिस्नेरी खोलामा सडक पुल निर्माणका लागि १५ लाख र मकवानपुरको राईगाउँ र काभ्रेपलाञ्चोकको तालढुङा जोडने सिक्रेदोभान पुलका लागि ३ करोड ९ लाख ५० हजार रुपैयाँ बजेट विनियोजन गरिएको बागमती प्रदेश भौतिक पूर्वाधार मन्त्रालय अन्तर्गतको यातायात पूर्वाधार निर्देशनालयका निर्देशक सहदेब भण्डारीले जानकारी दिनुभयो ।
बागमती प्रदेश सरकारले आन्तरिक तर्फको ५३ करोड ६८ लाख बजेट पुल निर्माणका लागि विनियोजन गरेको छ । जस अन्तर्गत प्रदेशले ७० वटा सडक पुलका लागि बजेट विनियोजन गरेको हो । यसमा मकवानपुर जिल्लाको ५ वटा पुल निर्माणका लागि बजेट विनियोजन भएको छ । मकवानपुरको हेटौंडा उपमहानगरपालिका वडा नम्बर ११ र १२ जोड्ने गरी राप्ति नदि पुल निर्माणका लागि ४ करोड रुपैयाँ बजेट विनियोजन भएको छ । त्यस्तै मकवानपुरको भिमफेदी गाउँपालिका वडा नम्बर १ मा पर्ने याङर्याङ खोला सडक पुलका लागि ४० लाख, भिमफेदी वडा नम्बर ३ र ४ जोड्ने गोल्पिङवेसी–राप्ति–आँपचौर सडक पुलका लागि ३० लाख, देउराली मोड–आर्पटे-भैसे सडकको डेडखोलामा सडक पुलका लागि ७५ लाख, हेटौंडा उपमहानगरपालिका वडा नम्बर १ मा पर्ने लालझाडी सडक पुलका लागि १ करोड रुपैयाँ विनियोजन भएको छ भने मकवानपुरको थाहा नगरपालिकामा पर्ने ईन्द्रायणी चौर-सतिघाट सडक पुलका लागि २ करोड रुपैयाँ बजेट विनियोजन भएको निर्देशनालयले जानकारी दिएको छ ।
झोलुङ्गे पुलका लागि ८ करोड ९६ लाख
बागमती प्रदेश सरकारले चालु आर्थिक वर्षमा झोलुङ्गे पुल निर्माणका लागि पनि बजेट विनियोजन गरेको छ । चालु आर्थिक वर्षमा बागमती प्रदेश सरकारले प्रदेशभर ११ वटा झोलुङ्गे पुल निर्माणका लागि ८ करोड ९६ लाख बजेट विनियोजन गरेको छ । बागमती प्रदेश सरकारले यसअघिको कुनै पनि आर्थिक वर्षमा झोलुङ्गे पुल निर्माणका लागि बजेट विनियोजन गरेको थिएन ।
बागमती प्रदेश सरकारको नयाँ कार्यक्रम भएको बागमती प्रदेश सरकारको भौतिक पूर्वाधार विकास मन्त्रालयले जनाएको छ । मकवानपुर जिल्लामा भने चालु आर्थिक वर्ष २०७७\०७८ मा २ वटा झोलुङ्गे पुलका लागि बजेट विनियोजन भएको छ । मकवानपुरको भिमफेदी गाउँपालिका वडा नम्बर ९ को धार्के दोभानको इपा खोलाको झोलुङ्गे पुल निर्माणका लागि ५० लाख र मकवानपुरको बागमती गाउँपालिका वडा नम्बर १ र सिन्धुली जिल्लाको हरिहरापुरगढी गाउपालिका वडा नम्बर २ जोड्ने बागमती खोला झोलुङ्गे पुलका लागि १ करोड ५० लाख बजेट विनियोजन भएको बागमती प्रदेश भौतिक पूर्वाधार विकास मन्त्रालय अन्तर्गत यातायात पूर्वाधार निर्देशनालयका इन्जिनियर विजय केसीले जानकारी दिनुभयो ।
