हटियाः मकवानपुर जिल्लाको हेटौंडा उपमहानगरपालिका वडा नम्बर १७, हटियास्थित बालबोध माविमा सूचना प्रविधि प्रयोगशालाको उद्घाटन गरिएको छ । हेटौंडा उपमहानगरपालिकाका मेयर हरिबहादुर महतले शनिबार एक कार्यक्रमका बीच सूचना प्रविधि प्रयोगशालाको उद्घाटन गर्नुभएको हो ।
नेपाल दूरसञ्चार प्राविधिकरणको सहयोगमा करिब २५ लाख रुपैयाँ लागतमा सूचना प्रविधि प्रयोगशाला तयार पारिएको हो । प्रयोगशालामा २४ वटा कम्प्युटर जडान गरिएका छन् ।
यस्तै बागमती प्रदेश सरकारको सहयोगमा विद्यालयका २० जना शिक्षकलाई ल्यापटप वितरण गरिएको छ । विद्यालय व्यवस्थापन समितिका अध्यक्ष कमलबहादुर विष्टको अध्यक्षतामा भएको प्रयोगशाला उद्घाटन कार्यक्रमकै अवसरमा हेटौंडा उपमहानगरपालिकाका मेयर हरिबहादुर महतले शिक्षकहरुलाई ल्यापटप वितरण गर्नुभएको छ । बागमती प्रदेश सरकारको सहयोगमा विद्यालयले सबै कक्ष्ाँकोठामा प्रोजेक्टर पनि जडान गरिसकेको छ । नियमित पठनपाठन सुचारु हुँदा शिक्षकले ल्यापटप र प्रोजेक्टरमार्फत पठनपाठन गराउने विद्यालयका प्रधानाध्यापक रमेश कुमार रिजालले जानकारी दिनुभयो ।
१२ कक्षासम्म पठनपाठन हुने बालबोध माविमा ६ सय विद्यार्थी अध्ययनरत छन् । यसैबीच विद्यालयका प्रधानाध्यापक रमेश कुमार रिजालले व्यक्तिगत रुपमा १० हजार रुपैयाँ सहयोग गरेर विद्यालयमा अक्षयकोषको पनि स्थापना गर्नुभएको छ । कार्यक्रममा हेटौंडा उपमहानगरपालिकाका मेयर हरिबहादुर महतका राजनीतिक सल्लाहकार नरहरि महत, वडा सदस्यहरु, विद्यालय व्यवस्थापन समितिका पदाधिकारी, छिमेकी विद्यालयका शिक्षक प्रतिनिधिको पनि उपस्थिति रहेको थियो ।
