हेटौँडाः सिन्धुली जिल्लाको हरिहरपुरगढी गाउँपालिका–२, जखौलीमा पिकअप गाडी अनियन्त्रित भई सडकबाट खस्दा एक जनाको मृत्यु भएको छ । मृत्यु हुनेमा जखौली बस्ने २० वर्षीय कैलाश राई रहेको बागमती प्रदेश प्रहरी कार्यालय हेटौँडाले जानकारी दिएको छ ।
शुक्रबार बेलुका ७ बजेर ४० मिनेटको समयमा भित्री सडक–खण्डमा श्रीपुरबाट जखौलीतर्फ जाँदै गरेको ना ३ च ५९७६ नम्बरको पिकअप गाडी आफै अनियन्त्रित भई सडकबाट ७ मिटर तल झरेको थियो । दुर्घटनामा गाडी चालक बागमती गाउँपालिका–११, बस्ने ३९ वर्षीय जगमोहन राउत, २२ वर्षीय अनिष राई, २१ वर्षीय अभिषेक राई र कैलाश घाइते भएका थिए । घाइते सबैलाई उपचारका लागि सिएमसी चुरेहिल अस्पताल हेटौंडा ल्याइएको थियो । उपचारको क्रममा राती ९ बजेर ४० मिनेटको समयमा कैलाश राईको मृत्यु भएको प्रहरीले जानकारी दिएको छ । अनिस र अभिषेकलाई सामान्य उपचार पश्चात डिस्चार्ज गरिएको छ ।
