हेटौँडाः काठमाडौं महानगरपालिकाको फ्रिडम फाइटर भेट्रान्सले तेस्रो संस्करणको राष्ट्रिय रोटरी पिप्ले क्याम्पा भेट्रान्स फुटबल प्रतियोगिताको उपाधि जितेको छ । हेटौँडा–५ स्थित पिप्ले–क्याम्पा रंगशालामा मंगलबार भएको फाइनल खेलमा झापाको पूर्वेली भेट्रान्स क्लबलाई ३–२ गोलले हराउँदै फ्रिडम फाइटर भेट्रान्स क्लबले उपाधि जितेको हो ।
उपाधि जितेसँगै फ्रिडम फाइटरले दुई लाख दुई हजार दुई सय २२ रुपैयाँसहित शिल्ड, मेडल तथा प्रमाणपत्र प्राप्त गरेको छ भने उपविजेता पूर्वेलीले एक लाख एक हजार एक सय ११ रुपैयाँसहित शिल्ड, मेडल तथा प्रमाणपत्र प्राप्त गरेको छ । रोटरी क्लब अफ मकवानपुरका अध्यक्ष अनिल अग्रवालको सभाध्यक्षता तथा हेटौंँडा उपमहानगरपालिकाका उपप्रमुख राजेश बानियाँको प्रमुख आतिथ्यमा पुरस्कार वितरण समारोह भएको थियो ।
फ्रिडमका निलेन्द्र देवानले पहिलो हाफको ३ मिनेटमा एक गोल गर्दै टिमलाई अग्रता दिलाएका थिए । पहिलो हाफकै २१ औं मिनेटमा थप एक गोल गर्दै निलेन्द्र देवानले खेललाई २–० गोलको स्थितिमा पुर्याए । दोस्रो हाफको खेलमा विकर्ण श्रेष्ठले एक गोल गर्दै ३–० को स्थिति रह्यो । ३–० ले पछि परेको पूर्वेलीका लागि मित्र बस्नेत र रमेश गुरुङले एक/एक गोल गर्दै खेललाई ३–२ को स्थितिमा पुर्याए पनि हारबाट बचाउन सकेनन् । म्यान अफ द म्याच फ्रिडम फाइटरका निलेन्द्र देवान घोषित भए ।
रोटरी क्लब अफ मकवानपुरको आयोजना, पिप्ले युवा क्लबको सहआयोजना तथा हेटौँडा उपमहानगरपालिकाको मुख्य सहयोगमा भएको प्रतियोगितामा १५ वटा टिमहरुको सहभागिता रहेको थियो । प्रतियोगितामाको सर्वोकृष्ट खेलाडी फ्रिडम फाइटरका निलेन्द्र देवान घोषित भए । उनले १० हजार रुपैयाँ नगद पुरस्कार प्राप्त गरेका छन् । फ्रिडम फाइटरबाट उत्कृष्ट गोलरक्षक सञ्जीव खड्गी, उत्कृष्ट डिफेन्डर राजकुमार घिसिङ, उत्कृष्ट मिडफिडर राजु तामाङ, उत्कृष्ट स्ट्राइकर विकास श्रेष्ठ र उत्कृष्ट प्रशिक्षक सुजल श्रेष्ठ घोषित हुँदै जनही ५ हजार रुपैयाँ पुरस्कार प्राप्त गरेका छन् । पुर्वेली भेट्रान्सका विजय श्रेष्ठले ५० वर्ष अधिक उमेर समूहको प्लेयर अवार्ड प्राप्त गरेका छन् । उनलाई पिप्ले युवा क्लबका अध्यक्ष सुवीन घिमिरेले २ हजार ५ सय रुपैयाँको नगद पुरस्कार प्रदान गर्नुभयो ।
