हेटौँडाः संविधान दिवसको अवसरमा आयोजना गरिएको निबन्ध लेखन प्रतियोगितामा पालुङ बहुमुखी क्याम्पसकी स्मारिका ढकाल प्रथम हुनुभएको छ । मंगलबार बागमती प्रदेशको सामाजिक विकास मन्त्रालयमातहतको शिक्षा विकास निर्देशनालयको कार्यालयमा भएको प्रतियोगितामा ढकाल प्रथम हुनुभएको शिक्षा विकास निर्देशनालयका सूचना अधिकारी घनश्याम खनालले जानकारी दिनुभयो ।
स्नातक र स्नातकोत्तर तहमा अध्ययनरत विद्यार्थीहरूलाई “संविधान कार्यान्वयनका नौं वर्षः उपलब्धि र चुनौति” विषयमा निबन्ध लेखन प्रतियोगिता गरिएको थियो । प्रतियोगितामा मकवानपुर जिल्लाका ३ वटा क्याम्पसबाट मात्रै विद्यार्थी सहभागी थिए । निबन्ध लेखनका लागि १ घण्टाको समय दिइएको खनालले जानकारी दिनुभयो । प्रतियोगितामा थाहा नगरपालिकामा रहेको पालुङ क्याम्पस, हेटौँडा–६ स्थित वंशगोपाल बहुमुखी क्याम्पस र हेटौँडा–२ स्थित मकवानपुर बहुमुखी क्याम्पसबाट ४ जना विद्यार्थी सहभागी भएका थिए ।
उपस्थित मध्ये पालुङ क्याम्पस मकवानपुरकी ढकाल प्रथम, मकवानपुर बहुमुखी क्याम्पसकी जमुना थिङ द्वितीय, वंशगोपाल बहुमुखी क्याम्पसकी प्रकृति पौडेल तृतीय र सन्तोष पुडासैनी सान्त्वना हुन सफल हुनुभएको छ । प्रतियोगितामा प्रथम, द्वितीय, तृतीय र सान्त्वना हुनेलाई बिहीबार मुख्यमन्त्री तथा मन्त्री परिषद्को कार्यालयले आयोजना गरेको कार्यक्रममा क्रमशः १० हजार, ८ हजार, ५ हजार र ३ हजार रुपैयाँ सहित प्रमाणपत्र प्रदान गरिनेछ ।
