हेटौंडाः बागमती प्रदेशको अर्थ तथा विकास समितिले विकास आयोजना छनोटलाई प्रभावकारी बनाउन अध्ययन समिति बनाउने निर्णय गरेको छ । समितिले प्रदेशको बजेट विनियोजनलाई प्रभावकारी बनाउन आयोजना बैंक निर्माण तथा सञ्चालनको विषयमा सरकारलाई निर्देशन दिन उक्त समितिले अध्ययन गर्ने निर्णय गरेको हो ।
समितिको मंगलबार बसेको बैठकले वडास्तरबाट नै छलफल गरी विकास आयोजना छनोट तथा आयोजना बैंकमा प्रविष्ट गर्ने उद्देश्यअनुसार उक्त समिति निर्माण गर्ने निर्णय गरेको हो । समितिको आगामी बैठकबाट छलफल गरी समिति गठन गर्ने र सो समितिले हालसम्मको अवस्था, बजेट विनियोजनको प्रणाली व्यवस्थापनका लागि आयोजना बैंक नबन्नुका कारणबारे अध्ययन गर्नेछ ।
समितिले आयोजना बैंक कार्यान्वनका समस्याबारे अध्ययन गरी सो विषयमा सरकारलाई निर्देशन दिने समितिका सचिव मनोजकुमार गुप्ताले जानकारी दिनुभयो । उहाँका अनुसार समितिको छलफलअनुसार वडा तहबाट नै आयोजना छनोट गरी विभागीय मन्त्रालयबाट प्रविष्ट गर्ने र प्राथमिकीकरणका आधारमा बजेट विनियोजन गरिनेछ ।
