हेटौँडाः मकवानपुरको थाहा नगरपालिकाकी दीना गोपाली यु–२० साउथ एसियन च्याम्पियनसीप दौड प्रतियोगितामा सहभागी हुने भएकी छन् । आउँदो सेप्टेम्बर १० देखि छिमेकी मुलुक भारतमा हुन लागेको साउन एसियन च्याम्पियनसीपको १०० मिटर दौड प्रतियोगितामा गोपाली सहभागी हुने भएकी हुन् ।
भदौ ८ गते काठमाडौं महानगरपालिकाको दशरथ रंगशालामा भएको छनोट प्रतियोगितमा १ सय मिटरको दौडमा प्रथम हुँदै मकवानपुरकी गोपाली अन्तर्राष्ट्रिय प्रतियोगिताका लागि छनोट भएकी हुन् । देशभरबाट सहभागी भएका १ सय जना प्रतिस्पर्धी खेलाडीहरुलाई पछि पार्दै गोपालीले छनोटमा स्वर्ण जितेकी हुन् ।
छनोट प्रतियोगितामा मकवानपुरबाट ३ जना खेलाडीहरु सहभागी भएकोमा गोपाली एसियन एथ्लेटिक्समा सहभागी हुन छानिएकी हुन् । विद्यालयस्तरीय राष्ट्रपति रनिङ शिल्डको राष्ट्रिय प्रतियोगितामा दीनाको उत्कृष्ट प्रदर्शन रहँदै आएको छ । गोपाली पहिलो पटक अन्तर्राष्ट्रिय प्रतियोगितामा छनोट भएकोमा मकवानपुरका खेल पदाधिकारी, खेलाडी र खेलकुदप्रेमीले खुसी व्यक्त गर्दै उनलाई शुभकामना दिएका छन् ।
