हेटौँडाः चितवनको भरतपुर महानगरपालिका–३ स्थित पुुलचोकमा रोकेर राखिएको ट्रकसँग मोटरसाइकल ठोकिँदा चालकको मृत्यु भएको छ । मृत्यु हुनेमा ना ५८ प ८५९४ नम्बरको मोटरसाइकल चालक चितवनको रत्ननगर नगरपालिका–६ का २८ वर्षीय सरोज कार्की रहेको बागमती प्रदेश प्रहरी कार्यालय हेटौँडाले जनाएको छ ।
मंगलबार राति करिब १ बजेको समयमा धादिङबाट आएर पुलचोकस्थित महानगरपालिकाको ढाट अगाडि कवाडी कर काट्न रोकेर राखेको मधेश प्रदेश ०३००१ ख ९४७३ नम्बरको ट्रकसँग गैंडाकोटतर्फ जाँदै गरेको उक्त मोटरसाइकल ठोकिँदा चालक कार्की गम्भीर घाइते भएका थिए । गम्भीर घाइते भएका कार्कीलाई उपचारका लागि जिल्ला सरकारी अस्पताल पठाइएकोमा राति नै १ बजेर ३५ मिनेटको समयमा डाक्टरले मृत घोषणा गरेको हो । प्रहरीले ट्रक चालक धादिङको धुनिबेसी नगरपालिका–९ स्थित नौबिसेका ३१ वर्षीय सुदिप रानालाई नियन्त्रणमा लिएर थप अनुसन्धान गरिरहेको जनाएको छ ।
यस्तै सोमबार सिन्धुलीको कमलामाई नगरपालिका–६ स्थित धुरा बजारमा एक वृद्ध मृत अवस्था फेला परेको छ । मृत फेला पर्नेमा सोही ठाउँस्थित एक घरमा भाडामा बस्ने ७० वर्षीय वृद्ध राम बहादुर मगर रहेको प्रहरीले जनाएको छ । मगर खुल्लामञ्चको खोला साइटस्थित ग्याबिन लगाएको ठाउँमा मृत अवस्थामा भेटिएको हो । स्थानीयले वृद्ध मृत अवस्थामा देखिएपछि प्रहरीलाई खबर गरेका थिए । दिउँसो २ बजे शव मुचुल्कापश्चात जिल्ला अस्पताल सिन्धुलीमा पोष्टमार्टमका लागि ल्याइए जनाएको छ ।
