हेटौंडाः मकवानपुरको बकैया गाउँपालिकाले शिक्षक बैङ्कको लागि खुला गरेको विज्ञापनको लिखित परीक्षाबाट ५७ जना अन्तरवार्ताका लागि छनोट भएका छन । छनोट भएका ५७ जना शिक्षकहरुको अन्तरवाता शनिबार गरिने गाउँपालिकाको शिक्षा शाखा प्रमुख आइतराम तामाङले जानकारी दिनुभयो ।
शिक्षक छनोटका लागि साउन १३ देखि १५ गतेसम्म भएको परीक्षाबाट प्राविमा ३६, निमाविमा ८ र माविमा १३ जना गरी ५७ जना शिक्षक अन्तरवार्ताका लागि छनोट भएको तामाङले जानकारी दिनुभयो । गाउँपालिकाले माग गरेअनुसार शिक्षक नआएको हुनाले अन्तरवार्ता पश्चात् फेरि पनि आवेदन खुलाउने भएको छ । गाउँपालिकाले प्राथमिक तहको लागि ५० जना शिक्षक माग गरेको थियो । निमावि र माविमा विषयगत १०–१० जना शिक्षकको लागि आवेदन खुलाएको थियो ।
७० जना शिक्षकका लागि गाउँपालिकाले माग गरेको विज्ञापनमा ४ सय ४५ जनाले आवेदन दिएका थिए । पहिलो चरणको परीक्षामा पनि सबैले परीक्षा नदिएको उहाँले बताउनुभयो । परीक्षा दिएकामध्ये प्राविबाट ७९ जना, निमाविबाट २४ जना र माविबाट २५ जना गरी १ सय २८ जना दोस्रो परीक्षाका लागि सफल भएका थिए । दोस्रो चरणमा सबैजना परीक्षामा उपस्थित नभएको तामाङले जानकारी दिनुभयो ।
दोस्रो चरणको लिखित परीक्षामा माविको साउन १३ गते, निमाविको १४ गते र प्राविको १५ गते सञ्चालन भएको थियो । गाउँपालिका अन्तर्गतको विद्यालयमा अहिले गणित र विज्ञानका शिक्षकको आवश्यकता रहेको जनाइएको छ । यस वर्ष गाउँपालिकाभित्र रहेका ७६ वटा विद्यालयहरुमा ८ हजार ३ सय ८३ जना विद्यार्थीहरु अध्ययनरत रहेका छन् ।
गाउँपालिकाले कुनै विषयको शिक्षक लामो समय विदामा बस्नुपर्दा विद्यार्थीको पठनपाठन र परीक्षा प्रभावित नहोस् भन्ने उद्देश्यले उक्त शिक्षकहरुको माग गरिएको शिक्षा शाखा प्रमुख तामाङले बताउनुभयो । गाउँपालिकाले आवेदकको परीक्षा लिएर उत्तीर्णहरुमध्येबाट शिक्षक प्रतीक्षा सूची तयार गर्ने र विद्यालयमा कार्यरत शिक्षक लामो समय बिदामा बस्दा बिदा अवधिभर उक्त प्रतीक्षा सूचीमा सूचीकृत शिक्षकलाई गाउँपालिकाले खटाउने उहाँले बताउनुभयो । गाउँपालिकाअन्तर्गत प्रावि ५३ वटा, मावि १२ वटा र ११ वटा निमावि गरी ७६ वटा विद्यालयहरु रहेका छन् ।
