हेटौंडाः हेटौंडा उपमहानगरपालिका मातहतमा रहेको दुईवटा नगर अस्पतालबाट साउन महिनादेखि पुनः डाक्टरसहितको सेवा सुचारु हुँदैछ । केहि महिनादेखि डाक्टरविहीन भएको ५–५ शैयाको पदमपोखरी अस्पताल र हटिया अस्पताल साउन महिनादेखि डा. गजल पन्त र डा. नरेन्द्र केसीद्वारा सञ्चालन हुने भएको छ ।
आगामी असार ३० गते बुधबार दुबैजना डाक्टर करार सम्झौता नियुक्ति भएपछि साउन महिनादेखि नगर अस्पतालमा डाक्टरको सेवा सुचारु हुने हेटौंडा उपमहानगरपालिकाकी प्रशासनिक अधिकृत बिना ठिकेले जानकारी दिनुभयो । डा. पन्तले पहिले राक्सिराङ गाउँपालिकाको आधारभूत अस्पतालमा सेवा प्रदान गरिरहनु भएको थियो । हटिया अस्पतालका एमडीजीपी डा. कमलराज न्यौपाने र पदमपोखरी अस्पतालका मेडिकल अधिकृत डा. निशान अर्याल दुबैजनाले राजीनामा दिएसँगै उपमहानगरले डाक्टर, अनमि र अहेवको लागि आवेदन माग गरेको थियो ।
डाक्टरविहीन भएपश्चात् दुई नगर अस्पतालले स्वास्थ्यचौकी स्तरको सेवा प्रदान गरिरहेको थियो । उपमहानगरमा डाक्टरको पदका लागि १० जनाले आवेदन दिएकोमा शनिबार ६ जना मात्र परीक्षामा सहभागी भएका थिए । यस्तै, उपमहानगरपालिकाले ५ जना अहेब माग गरेकोमा ३३ जनाले आवेदन दिएका थिए । ४ जना अनमी माग गर्दा २९ जनाले आवेदन पेश गरेका थिए ।
