हेटौंडाः यु–१७ प्रदेश छनोटको प्रारिम्भक सूचीमा मकवानपुरका १३ जना खेलाडी पर्न सफल भएका छन् । आइतबार बागमती प्रदेश फुटबल संघले ५५ जना किशोर खेलाडीहरुको अन्तिम नामावली सार्वजनिक गरेकोमा मकवानपुरका १३ जना पर्न सफल भएका हुन् ।
छनौट हुनेहरुमा साजन लोप्चन, सन्देश घलान, निशान बोगटी, रोहन तामाङ, कृतक स्याङ्तान, विशेष सुवेदी, रोहित मोक्तान, सनिष लामा, इमामी मोक्तान, प्रमेश खत्री, कोसिस मगर, कुशल अधिकारी र उप्रान्त आले मगर रहेका छन् । प्रदेशस्तरीय छनोट प्रतियोगितामा मकवानपुरबाट २४ जना सहभागी भएका थिए ।
साजन लोप्चन, सन्देश घलान, रोहन तामाङ, कृतक स्याङ्तान, विशेष सुवेदी, रोहित मोक्तान, सनिष लामा, इमामी मोक्तान, प्रमेश खत्री, कोसिस मगर, कुशल अधिकारी र उप्रान्त आले मगर सहभागीमध्ये मकवानपुरका आधाभन्दा बढी खेलाडीहरु प्रदेशमा छनोट हुन सफल भएका हुन् । प्रदेशबाट छनोट भएका ५५ जना खेलाडीहरुले आगामी साउन २५ गतेबाट ललितपुरको सातदोबाटोस्थित एन्फा कम्प्लेक्समा हुने केन्द्र्रीयस्तरको छनोट प्रतियोगितामा सहभागी हुनेछन् । एन्फाले नेपालका किशोर खेलाडीहरुलाई यु–१७ को भुटानमा हुने प्रतियोगितामा सहभागी गराउका लागि एन्फामा आवद्ध भएका ४८ वटा जिल्लाका फुटबल संघहरुलाई खेलाडी छनोट गर्ने निर्देशन दिएको थियो ।
केन्द्रीयस्तरको प्रतियागिताबाट छनोट हुने खेलाडीहरुले अक्टोबर १९ देखि २६ तारिखसम्म भुटानमा हुने एसियन कप क्वालिफाइ प्रतियोगितामा सहभागी जनाउन पाउनेछन् । मकवानपुर जिल्ला फुटबल संघले हेटौंडा–१० स्थित वनविज्ञान क्याम्पसको चौरमा दुई दिनको छनोट प्रतियोगिता गरेर जिल्लाबाट २४ जना खेलाडीहरुलाई प्रदेशको छनोट प्रतियोगितामा सहभागी गराएको थियो । जिल्ला फुटबल संघका उपाध्यक्ष युवराज लामाको संयोजकत्वमा छनौट प्रतियोगितामा १ सय ८७ जना किशोर खेलाडीहरु सहभागी भएका थिए ।
