हेटौँडाः मकवानपुरमा दुई सातामा बलात्कार तथा यौन दुव्र्यवहारका तीन वटा घटना भएको छ । जिल्ला प्रहरी कार्यालय मकवानपुरका अनुसार यही असार ३ गतेदेखि १७ गतेसम्मको अवधिमा बलात्कार तथा यौन दुव्र्यवहारका तीन वटा घटना भएको हो ।
मकवानपुरको कैलाश गाउँपालिकाकी एक युवतीले आफुलाई करणी भएको भन्दै प्रहरीमा उजुरी दिएकी छिन् । असार ३ गते कैलाशका २० वर्षीय मनोज मोक्तानले आफुलाई ज्यान मार्ने धम्कीसहितको डरत्रास देखाई हेटौँडामा बोलाएर करणी गरेको पीडितको आरोप छ । अभियुक्त मोक्तान अझै फरार छन् । चितवन जिल्लाको भरतपुरमा युवतीमाथि मनोज मोक्तानका भिनाजुले यौन शोषण गर्दै आएको बुझिएको छ । मनोजकी दिदीले आफ्नो श्रीमानसँगको सम्बन्ध थाहा पाएपछि मनोजलाई युवतीलाई डर, धम्की देखाएर घटनाबारे चुपचाप गराउन भनिएको बुझिन्छ । मनोजले युवतीलाई समेत डर, धम्की देखाई हेटौँडाको होटलमा राखेर यौन शोषण गर्नुका साथै युवतीसँग पैसा समेत लिएको बताइएको छ । मनोजले मार्ने धम्की दिएपछि पीडित युवतीले आफ्ना अभिभावकलाई आफूमाथि भइरहेको शोषणको विषयमा जानकारी गराएपछि घटना प्रहरीसम्म पुगेको हो । प्रहरीले मनोजको खोजी गरिरहेको जनाएको छ ।
यस्तै प्रहरीमा दुई वटा बाल यौन दुव्र्यवहार र एक जबरजस्तीकरणीको घटना दर्ता भएको छ । मकवानपुरको मनहरी–३ स्थित एक विद्यालयका शिक्षक बालयौन दुव्यवहारको अभियोगमा पक्राउ परेका छन् । पक्राउ पर्नेमा सोही वडाका ४४ वर्षीय दिनेश उप्रेती रहेका छन् । १३ वर्षीया बालिकामाथि यौन दुव्र्यवहारको अभियोग लागेपछि शिक्षक उप्रेतीलाई प्रहरीले पक्राउ गरेको हो । जिल्ला प्रहरी कार्यालय मकवानपुरका प्रहरी निरीक्षक प्रकाश साहका अनुसार असार १६ गते पीडित बालिकाले आफुमाथि शिक्षक उप्रेतीले दुव्र्यवहार गरेको भनेर प्रहरीमा उजुरी दिएकी थिइन् । उजुरी परेपछि प्रहरीले शिक्षक उप्रेतीलाई पक्राउ गरेर अनुसन्धानका लागि जिल्ला प्रहरी कार्यालयको हिरासतमा राखेर अनुसन्धान गरिरहेको छ । उहाँका अनुसार शिक्षक उप्रेतीमाथि असार १७ गते सोमबारदेखि असार २३ गते आइतबारसम्मका लागि म्याद लिएर अनुसन्धान थालिएको छ ।
यस्तै मकवानपुरको मकवानपुरगढी गाउँपालिकामा पनि एउटा बालिकालाई करणी गरेको भन्दै एकजना पक्राउ परेका छन् । पक्राउ पर्ने मकवानपुरगढी–६ का २६ वर्षीय रामजी विक रहेका छन् । असार ८ गते एक १५ वर्षीया बालिकालाई पैसाको प्रलोभन देखाई गरेको भन्दै प्रहरीमा उजुरी परेपछि प्रहरीले विकलाई सोही दिन पक्राउ गरेको थियो । भोलिपल्ट असार ९ गते विकलाई बालयौन दुव्र्यवहारसम्बन्धी मुद्दा चलाई प्रहरीले घटनामाथि अनुसन्धान सुरु गरेको छ । विकमाथि असार १५ गतेदेखि २० गतेसम्मका लागि दोस्रो पटक म्याद थप गरिरहेको छ । गएको जेठ महिनामा जिल्ला प्रहरी कार्यालय मकवानपुरमा ६ वटा जबरजस्तीकरणी र एक वटा बाल यौन दुव्र्यवहारको घटना दर्ता भएको थियो ।
