हेटौंडाः धनुषा जिल्लाको क्षीरेश्वरनाथ नगरपालिकाले आयोजना गरेको मेयर गोल्डकप फुटबल प्रतियोगितामा मकवानपुरको हेटौंडा फुटबल एकेडेमी सहभागी हुने भएको छ । आज शनिबारबाट सुरु हुन लागेको प्रथम संस्करणको मेयर कप फुटबल प्रतियोगितामा एकेडेमी सहभागी हुने भएको हो ।
प्रतियोगिताको खेलतालिका अनुसार सोमबार फुटबल एकेडेमीले गोल बजार स्पोर्टस् क्लबसँग प्रतिस्पर्धा गर्नुपर्नेछ । प्रतियोगितामा ८ वटा टिमहरुको सहभागिता रहेको छ । प्रतियोगितामा एकेडेमीसहित आयोजक क्षीरेश्वरनाथ नगरपालिका, नमुना जनउत्थान क्लब, गाईघाट फुटबल एकेडेमी, न्यू त्रियुगा स्पोर्टस् क्लब, वीरगञ्ज युनाइटेड र कटहरी युथ क्लबको सहभागिता रहनेछ ।
प्रतियोगिताको फाइनल खेल असार २२ गते हुनेछ । प्रतियोगिताको उपाधि विजेता टिमले दुई लाख रुपैयाँ र उपविजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।
