हेटौँडाः मकवानपुरको बकैया गाउँपालिकाबाट बहुमूल्य धातुजन्य खनिज अवैधरुपमा कौडीको मूल्यमा निकासी भइरहेको पाइएको छ । करिब ४ महिनादेखि विभिन्न सिमेन्ट उद्योगका लागि भन्दै अवैधरुपमा धातुजन्य खनिज अवैधरुपमा निकासी भइरहेको पाइएको छ । शुक्रबार राती हेटौँडा उपमहानगरपालिकाको नगर प्रहरीले हेटौँडा–१७, हटियाबाट निकासीका लागि आवश्यक कागजपत्र देखाउन नसकेपछि १५ वटा ट्रकलाई नियन्त्रणमा लिइएको थियो ।
शनिबार बिहान बिदाको दिनसमेत हेटौँडा उपमहानगरपालिकाले अघिल्लो दिनकै मितिमा जरिवाना तिराएर छाडेको थियो । प्रतिट्रक १८ हजार रुपैयाँका दरले उपमहानगरले जरिवाना गरेर छाडे पनि मकवानपुरका प्रमुख जिल्ला अधिकारी तीर्थराज चिलुवालले शनिबार प्रहरीमार्फत गाडी रोकेर खानी विभागबाट भुगर्भविद् ल्याउन पहल गर्नुभएको थियो । प्रमुख जिल्ला अधिकारी चिलुवालले ट्रक रोक्न निर्देशन दिनुभए पनि प्रहरीले भने १५ मध्ये ६ वटा मात्रै ट्रकलाई रोक्न सफल भयो ।
शुक्रबार रातीदेखि शनिबार दिउँसोसम्म हेटौँडा उपमहानगरपालिका अगाडि पार्किङ गरिराखेको ट्रकको विषयमा प्रहरीले अनविज्ञता प्रकट गरेको छ । प्रहरीको यस किसिमको अनविज्ञताले अवैध निकासीलाई अझ बल पुगेको देखिन्छ । आइतबार दिउँसो हेटौँडा आइपुग्नुभएका खानी विभागका भुगर्भविद् सौनक भण्डारी र प्रफुल्ल ताम्राकारले हेटौँडामा रोकिएका ६ वटै ट्रकको नमूना हेरेर धातुजन्य खानिजयुक्त माटो भएको पुष्टि गर्नुभएको छ । यसकिसिमको माटोको उत्खनन् तथा निकासीका लागि खानी विभागसँग अनुमति लिनुपर्ने, वातावरणीय प्रभाव अध्ययन गर्नुपर्ने प्रक्रिया पूरा नभएको पाइएको खानी विभागका भूगर्भविद् सौनक भण्डारीले जानकारी दिनुभएको छ ।
“हामीले यहाँ रोकिएका ट्रकमा लोड भएका माटोको प्रारम्भिकरुपमा हेर्दा धातुको मात्रा भएको खानीजन्य पदार्थको रुपमा देखेका छौं”, भुगर्भविद् भण्डारीले भन्नुभयो, “भोलि (सोमबार) बिहान हामी उत्खनन् भएको स्थानमै पुगेर हेर्छौं । त्यसपछि विभागको प्रयोगशालामै परीक्षण गरेर हेर्छौं ।”
