हेटौँडाः नेकपा एकीकृत समाजवादी पार्टीका नेता झलनाथ खनालले समाजवादको एजेण्डा बिना एमाले टिक्न नसक्ने बताउनुभएको छ । एमालेले जनताको बहुदलीय जनवाद (जबज) लाई भजाएर हिँडिरहेको तर, अब समाजवाद बिना एमाले पनि टिक्न नसक्ने उहाँले टिपपणी गर्नुभयो ।
एकीकृत समाजवादी हेटौँडा उपमहानगरपालिका कमिटीको शनिबारबाट सुरु भएको अधिवेशन उद्घाटन गर्नुहुँदै नेता खनालले पछिल्लो समय कम्युनिष्ट पार्टीहरुमा दक्षिणपन्थी अवसरवाद हावी भएको टिप्पणी गर्नुभयो । पूर्वप्रधानमन्त्ती समेत रहनुभएका खनालले दक्षिणपन्थी अवसरवादकै कारण दुई–तिहाई बुहमत प्राप्त नेकपाको सरकार ढालेर एमाले अध्यक्ष केपी शर्मा ओलीले प्रतिनिधिसभा संसद २ पटक विघटन गरेको आरोप लगाउनुभयो ।
‘अब सबै दलले समाजवादलाई मुख्य मुद्दा बनाउनु पर्छ । एमालेले जबज मात्र भनेर हुन्न । आजसम्म त जबज भनेर आइरहेको छ अब समाजवादलाई मुद्दा नबनाउने हो भने एमालेलाई पनि टिक्न गाह्रो छ । ढिलो चाँडो एमाले पनि समाजवादको मुद्दामा आउँछ’, खनालले भन्नुभयो, ‘कम्युनिष्ट पार्टीहरुमा दक्षिणपन्थी अवसरवाद हावी भएको छ । त्यसैको उपज हो दुई–तिहाई बहुमत प्राप्त नेकपाको सरकार ढालेको खड्ग प्रसाद शर्मा ओलीले २ पटक संसद विघटन गरेको ।’
एमाले विभाजन र विद्रोहको औचित्य पूष्टि गर्न बाँकी रहेको उहाँले बताउनुभयो । नेता खनालका अनुसार दक्षिणपन्थी अवसरवाद र संविधानको संरक्षण तथा कार्यान्वयनका लागि एमाले विद्रोह गरी एकीकृत समाजवादी पार्टी गठन भएको हो । वर्तमान समयमा साम्राज्यवादी शक्तिहरु निरन्तर कमजोर भइरहेको उहाँले दावी गर्नुभयो । साम्राज्यवादी शक्ति कमजोर बन्दै गएको, केही आक्रामक बन्दै गइरहेको उहाँको भनाई छ ।
‘साम्राज्यवादी शक्ति विशेषगरी अमेरिकी साम्राज्यवादका कारण विभिन्न देशमा युद्धहरु भइरहेको छ । युक्रेन र रुस बीचको युद्ध पनि साम्राज्यवादी शक्तिहरुको कार्य हो । सो युद्ध पूर्वीय र पश्चिमा शक्तिहरु बीच टकराव हो । इजरायल र प्यालेस्टाइन युद्ध पनि अमेरिकी साम्राज्यवादको कार्य हो’, उहाँले भन्नुभयो ।
नेता खनालका अनुसार हाल चीन समाजवादी शक्तिका रुपमा विकासित भइरहेको छ । चीन आर्थिक, सामाजिक रुपमा समाजवादी शक्तिका रुपमा अघि बढिरहेको उहाँले बताउनुभयो । चीनलाई कमजोर पार्न अमेरिकाले नेपाललाई प्रयोग गर्न खोजेको उहाँले आरोप लगाउनुभयो । चीनलाई कमजोर पार्न अमेरिकाले नेपाली भूमिमा सैनिक अड्डा बनाउने रणनीति बनाएको उहाँको भनाई छ । अमेरिकाले एमसीसी र एसपीपी परियोजना मार्फत् नेपाली भूमिमा सैन्य अड्डा बनाउने काम गरिरहेको उहाँले दावी छ ।
