हेटौँडाः बागमती प्रदेश सभामा आगामी आर्थिक वर्ष २०८१/८२ का लागि प्रदेश सरकारले प्रस्तुत गरेको नीति तथा कार्यक्रममाथि प्रदेश सभा सदस्यहरुको छलफल जारी छ । बुधबारबाट सुरु भएको छलफल बिहिबार पनि जारी छ । बिहिबार प्रदेश सभामा आगामी आर्थिक वर्षको नीति तथा कार्यक्रममाथिको छलफलमा सहभागी हुनुहुँदै प्रदेश सभा सदस्य भारती कुमारी पाठकले प्रदेश सरकारलाई जडिबुटी प्रशोधन केन्द्र स्थापना गर्न माग गर्नुभएको छ । अन्य प्रदेशसँग समेत सहकार्य गरेर जडिबुटी प्रशोधन केन्द्र स्थापना गर्न उहाँले माग गर्नुभएको छ ।
बागमती प्रदेशको मात्रै नभई देशका अन्य प्रदेशका जडिबुटीको समेत व्यवस्थापन कसरी गर्ने भन्ने विषयमा सरकारको ध्यानाकर्षण गराउनुभयो । उहाँले औषधी उत्पादन, सौन्दर्य प्रशाधन उत्पादनमा हाम्रै जडिबुटीको प्रयोग गर्ने गरी प्रशोधन केन्द्र स्थापना गर्न प्रदेश सरकारसँग आग्रह गर्नुभएको छ । सामुदायिक वन उपभोक्ता महासंघको निवर्तमान अध्यक्ष समेत रहनुभएकी पाठकले गणेश हिमाललाई संरक्षित क्षेत्र घोषणा गर्ने नीतिप्रति असहमति जनाउनुभयो । संरक्षण क्षेत्रको वर्तमान अवधारणाले त्यस क्षेत्रका आदिवासी जनजाति, महिला, किसानको अधिकार खोसिने भन्दै उहाँले चिन्ता व्यक्त गर्नुभयो ।
“गणेश हिमाल संरक्षण क्षेत्रको कुरा आएको छ । संरक्षण क्षेत्रले नागरिक पीडित हुने अवस्था रहन्छ । संरक्षण क्षेत्रको एउटा बाँदर किसानको बारीमा आयो भने त्यो बाँदरलाई छुन सकिँदैन”, पाठकले भन्नुभयो, “संरक्षण क्षेत्र होइन । गणेश हिमाललाई कसरी पर्यटकीय हिसाबले व्यवस्थापन गर्न सकिन्छ भन्नेमा सरकारको ध्यानाकर्षण गराउन चाहान्छु ।”
हाम्रो वन, समुदायको धन भन्ने नारा राम्रो रहेको र जलवायु परिवर्तनको समस्यालाई नीति तथा कार्यक्रमले सम्बोधन गरेको भन्दै उहाँले खुसी व्यक्त गर्नुभयो । प्रदेश सरकारले वातावरण परिषद् गठन गर्ने योजना राष्ट्रियस्तरको सिकाई हुने पाठकको दावी छ । परिषद् गठनले जलवायु परिवर्तन र यसका मुद्दाहरुले मुर्तरुप लिने उहाँको भनाइ छ । मानव वन्यजन्तु द्वन्द्वलाई सम्बोधन गरेको, डँढेलो नियन्त्रणको विषय नीतिमा समावेश भएको भन्दै उहाँले धन्यवाद व्यक्त गर्नुभयो ।
मकवानपुर जिल्ला लागुऔषध दूव्र्यसनको उच्च जोखिममा रहेकोले पुनस्र्थापना केन्द्र सञ्चालनमा प्रदेश सरकारले ध्यान दिन उहाँले माग गर्नुभयो । एकै वर्षको नीति तथा कार्यक्रमले सबैकुरा समेट्न नसक्ने जीकिर गर्नुहुँदै छलफलका क्रममा पक्ष–विपक्ष नभनी सुझावहरु प्राप्त भएको र यसले नीति तथा कार्यक्रमलाई अझ राम्रो बनाउन सहयोग पुग्ने पाठकले बताउनुभयो । केही कार्यक्रम झिना मसिना लागे पनि ती मसिना कार्यक्रमले ग्रामीण र विपन्न परिवारलाई छुने उहाँले दावी गर्नुभयो ।
