हेटौँडाः हेटौँडा–काठमाडौं छोटो मार्गअन्तर्गत मकवानपुरको भीमफेदी गाउँपालिका–६, जुरिखेतमा बुधबार कार दुर्घटनामा परी मृत्यु भएका एक पुरुष कारका चालक काठमाडौंको चन्द्रागिरी नगरपालिका–१, दहचोकका ६१ वर्षीय सानु परियार रहेको प्रहरीले जनाएको छ ।
परिवारका सदस्यले मृतकलाई पहिचान गरेको प्रहरीले जनाएको छ । बुधबार काठमाडौंबाट हेटौँडातर्फ आउँदै गरेको बा ६ च ९३७९ नम्बरको कार आफैं अनियन्त्रित भई जुरिखेतमा दुर्घटना हुँदा २ जनाको घटनास्थलमै र एकजनाको उपचारको क्रममा मृत्यु भएको हो । कार सडकबाट करिब २ सय ५० मिटर तल खसेको प्रहरीले जानकारी दिएको छ ।
३ महिनाकी शिशु र कार चालक सानु परियारको घटनास्थलमै मृत्यु भएको हो । ३ महिने शिशु मनहरी गाउँपालिका–८ की हुन् । कार दुर्घटनामा परी गम्भीर घाइते मकवानपुरको मनहरी गाउँपालिका–८, बेलुवाका २६ वर्षीय अर्जुन नेपालीको उपचारको क्रममा हेटौँडा अस्पतालमा बुधबार साँझ ७ बजेर ४० मिनेटको मृत्यु भएको जिल्ला प्रहरी कार्यालय मकवानपुरले जनाएको छ ।
दुर्घटनामा घाइते मकवानपुरको मनहरी गाउँपालिका–८ की २३ बर्षीया सरिता परियार र चितवनको राप्ती नगरपालिका–१, लोथरकी ३५ बर्षीया सानोकान्छी तामाङ रहेको प्रहरीले जानकारी दिएको छ । उनीहरूको हेटौँडास्थित मकवानपुर सहकारी अस्पतालमा उपचार भइरहेको छ ।
