हेटौंडाः बागमती प्रदेशका प्रदेश प्रमुख यादवचन्द्र शर्माले समतामूलक एवम् शोषणरहित समाज निर्माण गर्न जरुरी रहेको बताउनुभएको छ । मंगलबार १७ औँ गणतन्त्र दिवसको अवसरमा बागमती प्रदेश सरकारले आयोजना गरेको कार्यक्रमलाई सम्बोधन गर्दै उहाँले यस्तो बताउनुभएको हो ।
उहाँले न्याय र समानताको आधारमा प्राप्त उपलब्धीको संरक्षण–प्रवद्र्घन गर्दै थप उपलब्धीका लागि क्रियाशील रहन जरुरी रहेको बताउनुभएको छ । राष्ट्रिय अर्थतन्त्रलाई स्वतन्त्र, आत्मनिर्भर एवम् समुन्नत बनाउने दिशामा अघि बढ्नु आजको प्रमुख आवश्यकता रहेको प्रमुख शर्माले औँल्याउनुभयो । उहाँले सहिष्णुतामा आधारित सामाजिक, सांस्कृतिक मूल्यहरूको विकास गर्न जरुरी रहेको बताउनुभयो ।
‘सांस्कृतिक विविधताको सम्मान गर्दै सामाजिक सद्भाव, ऐक्यबद्धता र सामञ्जस्य कायम गरी राष्ट्रिय एकता सुदृढ गर्ने दिशामा हामी अघि बढ्नु पर्दछ ।’ उहाँले भन्नुभयो । गणतन्त्रात्मक शासन व्यवस्थाको मूल मर्मलाई कार्य प्रणालीमा रूपान्तरण गर्न सकिए यो व्यवस्थाले द्रुत गतिमा जनताको अवस्थामा सकारात्मक परिवर्तन ल्याउने शर्माको दाबी छ ।
यस्तै, कार्यक्रमलाई सम्बोधन गर्दै बागमती प्रदेशका मुख्यमन्त्री शालिकराम जम्कटेलले गणतन्त्र त्यसै प्राप्त नगरेको भन्दै धेरै संघर्ष गरेर गणतन्त्र आएको बताउनुभयो । समृद्ध नेपाल सुखी नेपालीको नाराका साथ गणतन्त्र प्राप्ति गरेको उहाँको भनाइ छ । हिजोको दिनमा सुरक्षा निकाय, सरकार पक्ष सबै मिलेर जनयुद्धको भागिदार हुन आवश्यक रहेकाले १२ बुँदे घोषणापत्र जारीपश्चात् गणतन्त्रको घोषणा भएको उहाँले स्मरण गराउनुभयो । आजको दिन गौरवमय इतिहास बोकेको दिन भएको बताउँदै सबैले गर्व गर्न आवश्यक रहेको उहाँको धारणा थियो ।
गणतन्त्र र राजनीतिको बारेमा वर्तमान समयमा समग्ररूपमा हेर्ने गरेका भन्दै राजनीतिमा १५–२० प्रतिशत मानिस विपक्षीमा रहेको र त्यो सबैमा लागू नहुने उहाँले बताउनुभयो । गणतन्त्रबाट धेरे मानिस खुसी रहेको उहाँको भनाइ छ । विधानले मार्गनिर्देश गरेअनुसार काम गर्नुपर्ने भनेर प्रण गर्न आवश्यक रहेको उहाँले औँल्याउनुभयो । गणतन्त्रले धेरै परिवर्तन गरेको बताउँदै प्रदेश सरकारले धेरै महत्वपूर्ण काम गरेको उहाँले जिकिर गर्नुभयो । विकासको एउटै उद्देश्य आर्थिक समृद्धि भएको बताउँदै प्रदेश सरकारले आर्थिक विकासलाई जोड दिने उहाँको भनाइ छ ।
बागमती प्रदेशका प्रथम मुख्यमन्त्री डोरमणि पौडेलले गणतन्त्रमा जनताले पाउनुपर्ने अधिकार पाएका छन् कि छैनन् भनेर हेर्न आवश्यक रहेको औँल्याउनुभएको छ । पछिल्लो समय संघीयता र गणतन्त्रलाई आत्मसाथ नगर्ने केही व्यक्तिहरूले विरोध गरेकाले गणतन्त्रवादीहरूले त्यसको प्रतिकार गर्न आवश्यक रहेको उहाँले बताउनुभयो । गणतन्त्र र संघीयताले गर्दा देशले काँचुली फेरेको भन्दै सामान्य जनताको छोराछोरी राष्ट्रपति हुनसक्ने अवस्थामा पुगेको बताउनुभयो ।
हिजोको दिनमा राजा र राणाको शासन भएको बेलामा सामान्य हिसाबले बोल्ने अवस्थासमेत नरहेको कुरालाई आत्मसाथ गरेर गणतन्त्रलाई संस्थागत गर्न आवश्यक रहेको उहाँको भनाइ छ । कानुन र संविधानले दिएको अधिकारअनुसार गणतन्त्रलाई संस्थागतरूपले लैजानुपर्ने पौडेलको धारणा छ । केन्द्रीय सरकारले अधिकार कुण्ठित गर्दा प्रदेश सरकार अहिले निरिह जस्तै रहेको उहाँको भनाइ छ ।
