हेटौँडाः बागमती प्रदेश युवा परिषद्को आयोजनामा प्रदेश युवा सम्मेलनको तयारी पूरा भएको छ । आगामी शुक्रबार, शनिबार र आइतबार तीन दिनसम्म सञ्चालन हुने प्रदेश युवा सम्मेलनमा २ सय युवा सहभागी हुने भएका छन् । प्रदेश युवा परिषद्ले मंगलबार पत्रकार सम्मेलन गरेर तयारी पूरा भएको जानकारी दिएको छ । प्रदेश युवा परिषद्का कार्यकारी उपाध्यक्ष सन्तोष चौलागाईले गत वर्षको सफलताको जगमा रहेर यो वर्ष तीन दिने प्रदेश युवा सम्मेलनको तयारी गरिएको जानकारी दिनुभयो ।
पूर्ण समावेशी अवधारणामा सहभागी छनोट गरिएको उहाँले जानकारी दिनुभयो । प्रदेशका १ सय १९ पालिकामध्ये ८९ वटा पालिकाबाट २०० युवा छनोट भएको चौलागाईले जानकारी दिनुभयो । सम्मेलनमा सहभागीहरुले अनलाइनमार्फत मात्रै आवेदन दिने व्यवस्था मिलाइएको थियो । सम्मेलनमा सहभागी हुन चाहने ५३७ जनाले अनलाइनमार्फत आवेदन दिएका मध्ये २०० जनालाई पूर्ण समावेशी अवधारणामा छनोट गरिएको छ ।
परिषद्को वार्षिक कार्यक्रमको रुपमा प्रदेशका युवाको ज्ञान, सीप र दक्षता अभिवृद्धि गर्न सम्मेलनको आयोजना गरिएको कार्यकारी उपाध्यक्ष चौलागाईले स्पष्ट पार्नुभएको छ । सम्मेलनमा सहभागी युवालाई नै लक्षित गरी अन्तरक्रिया, बहस, कार्यशाला, सहभागीबीच आपसी सञ्जाल निर्माण, प्रेरक सन्दर्भको व्याख्या र नेतृत्व तथा व्यक्तित्व विकाससँग सम्बन्धित क्रियाकलाप गरिने बताइएको छ ।
सम्मेलनमा सहभागी हुन चाहने युवा उद्यमशील, नवप्रवर्तन, विभिन्न पेशा, व्यवसायमा स्थापित भएको भए राम्रो हुने अपेक्षा गरिएको र सम्मेलनमा सहभागी युवाले नै आफ्नो समाज र मुलुकमा केही गर्न सकिन्छ भन्ने बुझाउन सकोस्, आपसमा ज्ञान, सीप आदानप्रदान गर्न सकोस् भन्ने अपेक्षा गरिएको कार्यकारी उपाध्यक्षको भनाइ छ ।
तीन दिनसम्म चल्ने सम्मेलनमा शिक्षातर्फ विशेषगरी विश्वविद्यालय तहको शिक्षामा विद्यार्थीको आकर्षण नहुनु, शिक्षाकै लागि विदेशिने प्रवृत्तिका विषयमा बहस हुनेछ । नीतितर्फ मूलनीति राजनीति र त्यसले समृद्धिको सन्दर्भमा निर्वाह गर्नुपर्ने सकारात्मक भूमिकाको विषयमा पनि बहस हुनेछ । यस्तैगरी नवप्रवर्तन र उद्यमशीलता, विदेशमा आर्जित ज्ञान, सीप र पुँजी देशमा लगानीको अवस्था र सम्भावनाका विषयमा बहस हुनेछ । सम्मेलनमा डिजिटल साक्षरताको विषयसँगै मुख्यमन्त्रीसँग युवाको अन्तरक्रिया आयोजना गरिनेछ । यस्तै सम्मेलनमा सहभागी युवालाई हेटौँडा बजार आसपासका धार्मिक पर्यटकीयस्थलको भ्रमण गर्ने गरी सम्पदा पदयात्रा समेत गराइनेछ ।
सम्मेलनअन्तर्गत आयोजना हुने बहसमा प्राध्यापक विद्यानाथ कोइराला, डा. मिनाक्षी दाहाल, प्रतिनिधिसभा सदस्य महेश बर्तौला, सुशीला थिङ, माधव सापकोटा, मनिष झालगायतका व्यक्तिको सहभागिता रहने छ । बहसलाई सहजीकरण गर्न पत्रकार बसन्त बस्नेत, टिकाराम यात्री, समा थापाको सहभागिता रहनेछ । यस्तै सम्मेलनका क्रममा ख्याति प्राप्त व्यक्तित्वको प्रेरणात्मक अभिव्यक्तिको व्यवस्था गर्नुका साथै संघर्ष र सफलताको कथाको प्रस्तुती समेत हुनेछ । हेटौँडा–४ स्थित रोयल पार्टी प्यालेसमा हुने सम्मेलनमा राष्ट्रिय युवा परिषद्का पदाधिकारी, ३ वटा प्रदेशको युवा परिषद्का पदाधिकारीको पनि सहभागिता रहनेछ ।
