हेटौंडाः मकवानपुर प्रहरीले अमेरिकन डलर देखाएर नेपाली रुपैयाँ ठगी गर्ने एक जनालाई पक्राउ गरेको छ । पक्राउ पर्नेमा सिन्धुपाल्चोकको बाह्रबिसे नगरपालिका–३ का ३५ वर्षीय डिलबहादुर भण्डारी रहेको जिल्ला प्रहरी कार्यालय मकवानपुरले जनाएको छ ।
आइतबार बिहान ८ बजेको समयमा रौतहटको गुजरा नगरपालिका–२ घर भई हाल चितवन भरतपुर महानगरपालिका–१० मा बस्ने ३८ वर्षीय खेमराज पौडेललाई भण्डारीले आफूसँग भएको डलर नेपाली रुपैयाँसँग साट्न भन्दै हेटौंडा बोलाएका थिए । भण्डारीले पौडेललाई विश्वास दिलाएर हेटौंडा–१२, आल्दमारस्थित भाइरल पुलमा बोलाएको भन्ने खबर प्राप्त हुनासाथ जिल्ला प्रहरी कार्यालय मकवानपुरबाट प्रहरी टोली खटिएको थियो ।
प्रहरीले भण्डारीलाई फेला पारी खानतलासी गर्दा उनको साथबाट अमेरिकन डलर ५० को ९ थान, नेपाली २० रुपैयाँको ५ सय ८० थान, मोबाइल ४ थान र बागमती प्रदेश ०२–०४९ प ३१२५ नम्बरको मोटरसाइकल फेला पारी बरामद गरेको छ । भण्डारीलाई नियन्त्रणमा लिएर ठगी उद्योग कसुरमा जिल्ला अदालत मकवानपुरबाट ५ दिनको म्याद लिएर अनुसन्धान गरिरहेको जनाएको छ ।
