हेटौंडाः अखिल नेपाल फुटबल संघ (एन्फा) ले छनौट गरेको १३ वर्षमुनी उमेर समूहका खेलाडीहरुमा मकवानपुरका दुई जना पर्न सफल भएका छन् । एकेडेमीमा छनौट हुनेमा मकवानपुरको बागमती गाउँपालिकाका रेजिन मसराङ्गी र बकैयाका समर्पण विक रहेका छन् ।
एन्फाले सोमबार एकेडेमीका लागि अन्तिम चरणको छनौटबाट ७५ जना खेलाडीको नाम सार्वजनिक गरेकोमा मकवानपुरका दुई जना पर्न सफल भएका हुन् । एन्फाले जिल्ला, प्रदेश र प्रदेश–प्रदेशबाट छनौट भएर आएका खेलाडीहरुबाट अन्तिम चरणको छनौट गरी ७५ जना खेलाडीहरुलाई एकेडेमीका लागि छनौट गरेको हो ।
मकवानपुर जिल्ला फुटबल संघले ३७ जना खेलाडी बागमती प्रदेशस्तरीय छनौटका लागि पठाइएकोमा प्रदेशबाट १४ जना राष्ट्रिय चरणमा छनौट हुन सफल भएका थिए । जसमध्ये दुई जनामात्र छनौट हुन सफल भएको हो ।
छनौट भएकाहरुलाई एन्फाले सञ्चालन गरेको मकवानपुरको इन्द्रसरोवरस्थित एकेडेमी, बुटवल र च्यासलमा राखिने एन्फाका केन्द्रीय सदस्य एवम् मकवानपुर जिल्ला फुटबल संघका अध्यक्ष टीका लामाले बताउनुभयो । किशोर खेलाडी उत्पादन गरी राष्ट्रिय टिम निर्माणका लागि एन्फाले किशोर खेलाडीहरु छनौट गरेको हो ।
एन्फाले एकेडेमी नै सञ्चालन गरेर किशोर खेलाडीहरुलाई प्रशिक्षण दिन लागेको छ । एकेडेमीका लागि छनौट हुन सफल खेलाडीहरुले पढाईका साथसाथै निःशुल्क फुटबल प्रशिक्षण गर्ने अवसर पाउनेछन् ।
