हेटौंडाः जिल्ला प्रहरी कार्यालय मकवानपुर (जिप्रका) ले जफत गरेका सवारी साधनहरु लिलामी बिक्री गर्ने भएको छ । शुक्रबार एक सूचना प्रकाशित गर्दै जिल्ला प्रहरी कार्यालय मकवानपुरका प्रमुख प्रहरी उपरीक्षक सीताराम रिजालले सवारी साधनहरुको लिलाम बिक्री गरिने बताउनुभयो ।
जिल्ला प्रहरी कार्यालय मकवानपुरले विभिन्न समयमा जफत गरेका वेवारिसे मोटरसाइकल १ सय ५४ वटा, सरकारी सवारी साधनहरु जीप दुई वटा र मोटरसाइकल एउटा रहेका छन् । यस्तै, मेशिनरी सामानहरु टिभी ७ थान, प्रिन्टर ४ थान, युपिएस १ थान र मेघाफोन १४ थान रहेका छन् । वेवारिसे मोटरसाइकलहरुको मूल्य ६ लाख ८१ हजार ३ सय ४० रुपैयाँ, तीन वटा सरकारी साधनहरुको १ लाख २७ हजार ९ सय ४८ र मेशिनरी सामानहरुको ९ हजार ९ सय रुपैयाँ न्यूनतम मूल्य तोकिएको छ ।
उक्त सामग्रीहरु खरिद गर्न १५ दिनभित्र जिल्ला प्रहरी कार्यालय मकवानपुरको आर्थिक प्रशासन शाखामा उपस्थित भएर कोटेशन लिन सकिने जनाइएको छ । जिप्रका मकवानपुरका प्रहरी उपरीक्षक रिजालले जफत भएका तीन वटा सरकारी सवारी साधनहरु पनि नचल्ने अवस्था रहेकाले लिलामीमै बिक्री गर्न लागेको बताउनुभयो । उक्त सामग्रीहरु अब कवाडको रुपमा जानेछ । कुनै कागजात नभएका कारण चलाउन पनि नमिल्ने भएकाले उक्त साधनहरु अब कवाडका काम प्रयोग हुनेछ ।
