हेटौँडा–२ स्थित मकवानपुर बहुमुखी क्याम्पसलाई बागमती प्रदेश सरकारले प्रदेश सार्वजनिक विश्वविद्यालय बनाउने निर्णय गरेर आवश्यक प्रक्रिया अगाडि बढाएको छ । सामुदायिक क्याम्पसलाई विश्वविद्यालय बनाउने प्रदेश सरकारको प्रयासले मकवानपुरवासीमा सुखद् सञ्चार गरेको छ । विश्वविद्यालय बन्दै गरेको मकवानपुर बहुमुखी क्याम्पसका प्राध्यापकहरुको साझा संस्था पब्लिक क्याम्पस प्राध्यापक संघमा हालै नयाँ नेतृत्व चयन भएको छ । यसै सन्दर्भमा नवनिर्वाचित अध्यक्ष घनश्याम घिमिरेसँग समृद्ध समाज दैनिकका सम्पादक सुरेश श्रेष्ठले गर्नुभएको कुराकानीको सम्पादित अंशः
समाजः प्रदेश सरकारले मकवानपुर बहुमुखी क्याम्पसलाई सार्वजनिक विश्वविद्यालय बनाउने प्रक्रिया अघि बढाइरहेको छ । प्रदेश सरकारको घोषणापछि मकवानपुर क्याम्पससँग सरोकार राख्ने प्राध्यापकलगायल अरु सरोकारवाला निकायहरुमा कस्तो माहौल छ ?
घिमिरेः देश संघीयतामा गएपछि अरु अधिकारहरु विकेन्द्रित ढंगले अघि बढ्नुपर्छ भन्ने मान्यताका साथ प्रदेश सरकारले आफ्नै किसिमले सञ्चालन गर्नसक्ने मान्यता रहेको छ । त्यहि मान्यता अनुसार सातै वटा प्रदेशमा कतिपय प्रदेशहरुले विश्वविद्यालय स्थापना गर्ने, सञ्चालन गर्ने गरिरहेका छन् । त्यहि दौरानमा बागमती प्रदेश सरकारले पनि मदन भण्डारी स्वास्थ्य विज्ञान प्रतिष्ठान सञ्चालन गरिरहेको छ र अतिरिक्त विश्वविद्यालय पनि सञ्चालन गर्नुपर्छ भन्ने मान्यता राख्यो । त्यहि मान्यताअनुसार प्रदेशको मात्र होइन, नेपालकै उत्कृष्ट सामुदायिक क्याम्पसमध्यको एक मकवानपुर बहुमुखी क्याम्पस, जुन हेटौंडामा अवस्थित छ, बागमती प्रदेश सरकारले विश्वविद्यालय बनाउने घोषणा गरेको छ । जुन हामी प्राध्यापकका लागि सुखद् पक्ष हो । हामी प्राध्यापकसँगै मकवानपुर बहुमुखी क्याम्पससँग सरोकार राख्ने सबै पक्षलाई सुखद् सन्देश प्रवाह गरेको छ ।
समाजः प्रदेश सरकारले विश्वविद्यालय बनाउने घोषणा गरिसकेपछि तपाईंहरुसँग प्रदेश सरकारको अधिकारी र विश्वविद्यालयको अधिकारीहरुको बीचको छलफलहरु, क्रियाकलापहरु कस्तो छ ?
घिमिरेः जुन ढङ्गले प्रदेश सरकारले विश्वविद्यालय घोषणा गर्ने निर्णय ग¥यो, निर्णय गरिसकेपछि आफ्नो तहबाट गर्नुपर्ने कार्यहरु गरिरहेको होला । तर, क्याम्पस परिसरमा आएर स्थलगतरुपमा र सम्बन्धित सरोकारवालासँग राय, सुझाव लिने किसिमको काम अहिलेसम्म भएको छैन ।
समाजः प्राध्यापक संघको हालै अध्यक्ष चयन हुनुभयो । प्राध्यापकहरुको हिसाबले समुदायद्वारा सञ्चालित भइरहेको क्याम्पस अब प्रदेशद्वारा विश्वविद्यालय सञ्चालन हुने भनिसकेपछि के कस्ता अवसरहरु र के खालका चुनौतीहरु प्राध्यापकहरुलाई आउँछन् ?
घिमिरेः मकवानपुर बहुमुखी क्याम्पस भनेको मकवानपुरबासीहरुको साझा शैक्षिक सम्पत्ति हो जस्तो लाग्छ । किनभने यहाँका समाजसेवीहरुले २०३७ सालमा स्थापना गरेर यहाँसम्म सञ्चालन गर्दै आइरहेको संस्था हो । शिक्षक, कर्मचारी र व्यवस्थापन समितिको प्रतिफलको रुपमा रहेको छ, जसलाई अभिभावक र विद्यार्थीहरुले विश्वास गर्दै आइरहनुभएको छ । प्रदेश सरकारले विश्वविद्यालय घोषणा गर्नु एक खुशीको कुरा पनि हो । वृहत् शैक्षिक गुणस्तर बन्नु पर्छ ।
समाजः सामुदायिक हिसाबले नै एक खालको सामाजिक काम गरौं भन्ने एउटा प्लेटफर्म थियो, जहाँ सञ्चालक समितिको संरचना विश्वविद्यालय हुँदा कस्तो रुपान्तरण हुन्छ ? त्यहाँ सेवा गरिरहेका व्यक्तिहरुमा अवसर वा चुनौती के देख्नुहुन्छ ?
घिमिरेः अहिले देशभित्र जसरी विश्वविद्यालय स्थापना भइरहेको छ, त्यो हिसाबले हामीले यो विश्वविद्यालय फरक सञ्चालन गर्नुपर्ने माथि प्रश्न उठ्न सक्छ । यहाँनिर राजनीतिक व्यक्तिहरु, अभिभावकहरुको संरचनाको निर्माण हुनुपर्छ । सम्पूर्ण सरोकारवालाहरुले विश्वविद्यालयको नीति नियम बनाउने विश्वासको साथ संरचनामा जानुपर्छ जस्तो लाग्छ ।
समाजः प्राध्यापकहरुको तहबाट विश्वविद्यालय स्थापना भएर व्यवस्थित सञ्चालन हुँदै जानेमा कति विश्वस्त हुन सक्नुहुन्छ ?
घिमिरेः विश्वविद्यालय कुन ढङ्गबाट सञ्चालन हुन्छ भन्नेबारे सरोकारवालाहरुभित्र छलफल भएको छैन । अब कुन किसिमले विधान बनेको छ ? मार्गदर्शन कसरी गर्छ, त्यहाँ रहेका प्राध्यापकहरु र कर्मचारी सरोकारवालाहरु अनुभूत हुने कुराको बारेमा छलफल हुन बाँकी छ । प्रदेश सरकारकै पहलमा विश्वविद्यालयको रुपमा रुपान्तरण हुने कुरामा हामी विश्वस्त छौं र यसबाट प्रदेश र मुुलुकले नै लाभ लिने अवसर रहनेमा हामी आशावादी छौं ।
