हेटौँडाः बागमती प्रदेश खेलकुद विकास परिषद्को आयोजनामा आगामी चैत २ गतेदेखि अन्तर प्रदेशस्तरीय राष्ट्रिय खेलकुद प्रतियोगिता सुरु हुँदैछ । चितवनको भरतपुरस्थित गौतमबुद्ध अन्तर्राष्ट्रिय क्रिकेट रंगशालामा प्रधानमन्त्री पुष्पकमल दाहाल प्रचण्डले प्रतियोगिताको उद्घाटन गर्नुहुनेछ ।
प्रतियोगिताको उद्घाटनमा सहभागिताका लागि प्रधानमन्त्री प्रचण्डलाई आइतबार भेट गरेर निमन्त्रणा गरिएको बागमती प्रदेश खेलकुद विकास परिषद्का सदस्य–सचिव सूर्यलाल भण्डारीले जानकारी दिनुभयो । बागमती प्रदेशका मुख्यमन्त्री शालिकराम जमकट्टेल, आन्तरिक मामिला तथा कानुनमन्त्री गंगानारायण श्रेष्ठ र सामाजिक विकासमन्त्री कुमारी मोक्तानसहित प्रदेश खेलकुद विकास परिषद्का टिम प्रधानमन्त्री प्रचण्डलाई निमन्त्रणा दिन पुग्नुभएको हो ।
प्रतियोगिताको तयारी अन्तिम चरणमा पुगेको सदस्य–सचिव भण्डारीले बताउनुभयो । प्रतियोगिताका लागि प्रदेशले फागुन २४ र २५ गते खेलाडी छनौटका लागि कार्यतालिका सार्वजनिक गरेको उहाँले बताउनुभयो । प्रतियोगितामा लागि ९ विधामा खेलाडी छनौट गरिने उहाँले बताउनुभयो । प्रतियोगितामा भलिबल, फुटबल, क्रिकेट, कराँते, एथ्लेटिक्स, ब्याड्मिन्टन र पौडीका लागि खेल हुने उहाँले बताउनुभयो । प्रदेशले बक्सिङतर्फको खेलाडी भने छनौट गरिसकेको उहाँले बताउनुभयो । प्रतियोगितामा ७ वटै प्रदेशले आ–आफ्नो खेलाडी छनौट गरेर प्रतियोगितामा सहभागी जनाउनेछन् । बागमती प्रदेशले भने विगतमा दुर्ई पटक आयोजना गरेको प्रदेश खेलकुद प्रतियोगिताबाट उत्पादन भएका खेलाडी, नवौं राष्ट्रिय खेलकुद प्रतियोगितामा सहभागी खेलाडी, प्रदेशबाट राष्ट्रियस्तरका प्रतियोगितामा प्रतिनिधित्व गरेको र विभिन्न विधाका खेलाडीमध्येबाट छनौट गरिने उहाँले बताउनुभयो ।
प्रदेशभित्रको खेलाडीको पहिचान र खेललाई प्रवद्र्धन गर्न प्रतियोगिता आयोजना गर्न लागेको उहाँले बताउनुभयो । उहाँका अनुसार प्रतियोगिताका लागि सातै वटा प्रदेशबीच समझदारी भएको छ । बागमती प्रदेशले पहिलेदेखि नै प्रतियोगिता आयोजना गर्नका लागि पहल गर्दै आएका कारण बागमतीले पहिलो संस्करणको प्रतियोगिता आयोजना गर्ने अवसर पाएको उहाँले बताउनुभयो । आगामी संस्करणका प्रतियोगिता सबै प्रदेशले पालैपालो गर्ने उहाँले बताउनुभयो । यस पटकको प्रतियोगिताका लागि ६ करोड बजेट विनियोजना भएको सदस्य–सचिव भण्डारीले बताउनुभयो ।
बागमती प्रदेश सरकारको प्रमुख लगानी रहेको गौतम बुद्ध अन्तर्राष्ट्रिय रंगशालालाई प्रचारप्रसार र निर्माणका लागि सबैको चासो पुर्याउन प्रतियोगिताको उद्घाटन कार्यक्रम चितवनमा राखिएको उहाँले बताउनुभयो । चितवनमा क्रिकेट खेलको सुरु गरेर प्रतियोगिताको उद्घाटन हुने उहाँले बताउनुभयो । उद्घाटन कार्यक्रममा सातै वटा प्रदेशका मुख्यमन्त्रीहरुको उपस्थिति रहने जनाएको छ । प्रदेशले प्रतियोगिता जिल्लाहरुमा रोटेसन, निर्माणाधीन पूर्वाधारहरुलाई मर्मत र संरक्षण हुने भएकाले यो वर्ष चितवनमा सबैजसो खेल राखिएको उहाँले बताउनुभयो । यसअघि प्रदेश खेलकुद प्रतियोगिता आयोजना गर्दा सबैजसो खेलहरु हेटौंडामा आयोजना गरेको र यस पटक भने चितवनमा बढी खेल राखिएको उहाँको भनाई छ । भरतपुर महानगरपालिकाले अहिले भ्रमण वर्ष आयोजना गरिरहेको हुँदा प्रतियोगिताका लागि महानगरपालिकाले सहयोग गर्ने उहाँले बताउनुभयो ।
प्रतियोगिताको समापन चैत ८ गते हेटौँडा–५ स्थित पिप्ले क्याम्पा रंगशालामा हुनेछ । प्रतियोगिता अन्तर्गत महिला र पुरुष दुवैतर्फको खेल हेटौँडामा आयोजना हुनेछ । महिलातर्फको खेल गौरिटार रंगशालामा र पुरुषतर्फको फुटबल खेल पिप्ले–क्याम्पा रंगशालामा आयोजना हुनेछ । फुटबलको फाइनल समापनसँगै प्रतियोगिताको पनि समापन गरिने सदस्य–सचिव भण्डारीले बताउनुभयो । मकवानपुरमा फुटबलको क्रेज बढी पाइएको कारण हेटौँडामा फुटबल खेल राखिएको उहाँको भनाई छ । प्रतियोगिता अन्तर्गत चितवनमा महिला र पुरुष दुवैतर्फको भलिबल, क्रिकेट, तेक्वान्दो, कराँते, एथलेटिक्स, ब्याडमिन्टन र पौडीका खेलहरु आयोजना हुनेछ ।
