हेटौंडाः चलचित्र पत्रकार संघ नेपालको प्रथम राष्ट्रिय भेला १३ बुँदे घोषणापत्र जारी गर्दै सम्पन्न भएको छ । हेटौंडामा शनिबारबाट सुरु भएको भेला मंगलबार घोषणापत्र जारी सँगै सम्पन्न भएको हो ।
भेलामा विभिन्न विषयमा अन्तरसंवादका साथै कार्यशाला भएका थिए । कार्यक्रममा सहभागी हुन देशभरबाट करिब दुई सय चलचित्र पत्रकार र कलाकारहरुको उपस्थिति रहेको थियो । संस्था स्थापनाको २५ वर्ष पूरा भएको अवसरमा संघको आयोजनामा भएको भेलामा सिनेमा र पर्यटन संवाद, अन्तरक्रिया, कार्यशाला, गोष्ठी, कार्यपत्र प्रस्तुतलगायत विषयका सेसन सञ्चालन भएका थिए । भीमफेदी–कुलेखानी सुरुङमार्ग निर्माण गरी हेटौंडासहित समग्र मकवानपुरलाई फिल्म हवको रुपमा विकास गर्नुपर्ने घोषणापत्रमा उल्लेख छ । केन्द्रीय सरकार, प्रदेश सरकार र स्थानीय सरकारले स्थानीय पर्यटकीय ठाउँको पर्यटन प्रवद्र्धनका लागि सिनेमा पर्यटनलाई जोड दिँदै विभिन्न कार्यक्रमहरु तय गर्नुपर्ने माग घोषणापत्रमा गरिएको छ । यस्तै, हेटौंडाको आसपासका क्षेत्र र मकवानपुरको चित्लाङ, कुलेखानी, दामन, पालुङ, मकवानपुरगढीलगायत ठाउँमा सिनेमा पर्यटनलाई जोड दिई आवश्यक पूर्वाधार निर्माणका लागि प्रदेश र स्थानीय सरकारले आवश्यक बजेट विनियोजन गर्नुपर्ने उल्लेख छ ।
नेपाली सिनेमा बजारको अध्ययन, अनुसन्धान, व्यवस्थापन र विस्तारका लागि विभिन्न कार्यक्रमहरु सञ्चालन गर्न र नेपाली सिनेमा बजारको विस्तारका लागि निरन्तर योगदान गरिरहेका व्यक्ति तथा सस्थाहरुसँग सहकार्य, समन्वय गरी प्रोत्साहन र प्रवद्र्धन गर्नुपर्ने घोषणापत्रमा उल्लेख छ । विट पत्रकारिताको समस्या सम्बोधन गरी यसको संरक्षण र प्रवद्र्धनका लागि विशेष योजना बनाउनुपर्र्ने, अनलाइन पत्रिका तथा बिट पत्रकारितालाई पनि लोककल्याणकारी विज्ञापनले समेट्नुपर्ने घोषणापत्रमा उल्लेख गरिएको छ । स्वायत्त चलचित्र उद्योगका लागि समयानुकूल र नेपाली चलचित्रको विकासका लागि प्रभावकारी रुपमा चलचित्र ऐन यथाशक्य संशोधन गर्नुपर्ने र नेपाली सिनेमाको माध्यमबाट पर्यटन प्रवद्र्धनका लागि प्रभावकारी कार्यक्रमहरु तय गर्नुपर्नेसमेत घोषणापत्रमा समावेश गरिएको छ । यस्तै, कला, संस्कृति र पहिचानसहितको मौलिक चलचित्र तथा अन्तर्राष्ट्रियरुपमा प्रतिनिधित्व गर्ने नेपाली चलचित्र वा चलचित्रकर्मी र महोत्सवहरुमा जाने चलचित्र तथा चलचित्रकर्मीलाई प्रोत्साहन तथा प्रवद्र्धन र प्रचारप्रसार गर्नुपर्ने घोषणापत्रमा जनाइएको छ ।
श्रमजीवी पत्रकार ऐनको पूर्ण कार्यान्वयन गर्नुपर्ने, सरकारले पत्रकार सम्बद्ध संघसंस्थालाई दिँदै आएको सहुलियत अनुदान रकम वृद्धि गरी आर्थिक वर्षको सुरुवातमै उपलब्ध गराउनुपर्ने घोषणापत्रमा छ । हेटौंडाको मकवानपुरगढी, शहीद स्मारक, कुष्माण्ड सरोवर त्रिवेणी धाम, वनस्खण्डी, भूटनदेवी मन्दिर, पाथिभरा, पुष्पलाल पार्क, चिप्लेटी गाउँ, हर्नामाडी मूर्तिपार्क लगायतका ठाउँहरुलाई प्रवद्र्धनका लागि सिनेमामार्फत् प्रस्तुत गर्न र त्यसका लागि स्थानीय सरकारले समन्वय र सहुलियतको व्यवस्था गर्नुपर्ने माग राख्दै घोषणापत्र जारी गरेको छ ।
