हेटौंडाः हेटौंडा–४ स्थित रोटरी क्लब हेटौंडाको सभाहलमा प्रदेश सरकारसँग अन्तक्रिया कार्यक्रम भएको छ । बागमती प्रदेश उद्योग परिसंघको आयोजनामा भएको कार्यक्रम उद्योग, वाणिज्य, भूमि तथा प्रशासनमन्त्री रामकृष्ण चित्रकारले कार्यक्रममा उठेको वैध मुद्दामा काम गर्ने बताउनुभएको छ ।
कार्यक्रममा विभिन्न पदाधिकारीले समस्या उठाएका थिए । औधोगिक नीति तथा कार्यक्रम, ऐन नियमसम्बन्धी भएको कार्यक्रममा मन्त्री चित्रकारको प्रमुख आतिथ्य र बाग्मती प्रदेश उद्योग प्ररिसंघका अध्यक्ष लेखराज पोखरेलको अध्यक्षता रहेको थियो । कार्यक्रममा अध्यक्ष पोखरेलले प्रादेशिक नीति, प्रादेशिक कानुनमा संशोधन गर्नुपर्ने, कार्यक्रम तथा बजेटमा समावेश गर्नुपर्ने, प्रदेश मन्त्रालयले आफैले निर्णय गरी संशोधन गर्न सक्ने, प्रदेश सरकारले केन्द्रमा सिफारिस गर्नुपर्ने र सार्वजनिक निजी साझेदारी कार्यक्रमका विषयहरुमा प्रस्तुतिकरण गर्नुभएको छ । अन्तक्रिया कार्यक्रममा बागमती प्रदेशका विभिन्न मन्त्रालयका प्रतिनिधि, उद्योगी, व्यवसायीलगायतको उपस्थिति रहेको थियो ।
प्रदेशमा औद्योगिक क्षेत्रमा गर्न सकिने कामलाई व्यवहारिकरुपमा गर्ने उद्देश्यले कार्यक्रमको आयोजना भएको हो । कार्यक्रममा पोखरेलले उद्योग दिवस २०८० मा सहभागीहरुले उठाएका नीतिगत सुधारका विषयमा प्रस्तुतिकरणसमेत गर्नुभएको थियो । उद्योग दिवसको अवसरमा सहभागीहरुले उद्योग सञ्चालनमा प्रादेशिक सरकारले जारी गर्नुपर्ने ऐन नियमहरु स्पष्टरुपमा जारी गर्नुपर्ने र पालनासमेत गर्नुपर्ने, राज्यले लगाएको दोहोरो कर हटाउनुपर्ने, श्रमिकहरुलाई मंहगीको अनुपातमा बाँच्न सकिने गरी तलब भत्ताको व्यवस्था गरिनुपर्ने, उद्योगसँग नेपाल विद्युत् प्राधिकरणले डिमान्ड शुन्क दिरहेको छ र त्यसलाई खारेज गर्नुपर्नेलगायतका माग गरेको छ ।
कार्यक्रमबाट औद्योगिक क्षेत्रमा कमजोर निर्णय निस्किएको बताउनुहुँदै मन्त्री चित्रकारले निस्किएको वैध मुद्दामा काम गर्ने बताउनुभएको हो । उहाँले यस क्षेत्रमा रहेको दृष्टिकोणमा सुधार ल्याउन जरुरी रहेको बताउनुभयो । कार्यक्रममा सहभागीहरुले स्थानीयमा औद्योगिक कपडाको व्यवस्था, उद्यमीलाई विभिन्न कारण जेल हाल्ने कानुन खारेज, उद्योगको तथ्यांककोे अनुसन्धान विकासका कुरा राखेका थिए ।
