हेटौंडाः मकवानपुरगढी गाउँपालिका–३, मक्रान्चुलीस्थित भानु माध्यमिक विद्यालयको विद्यालय व्यवस्थापन समिति अध्यक्षमा खिलप्रसाद चौलागाई सर्वसम्मत चयन हुनुभएको छ । सर्वसम्मतका लागि शनिबार बसेको बैठकले अभिभावक चौलागाईलाई अध्यक्ष चयन गरेको विद्यालयका प्रधानाध्यापक राजेन्द्र थापाले जानकारी दिनुभयो ।
बैठकमा मकवानपुरगढी गाउँपालिका स्रोत शिक्षक तथा गाउँपालिकाका विद्यालय निरीक्षक दाशरथी उपाध्याय भण्डारीले विद्यालय व्यवस्थापन समिति निर्वाचन उपसमितिको प्रतिनिधित्व गर्नुभएको थियो । विद्यालयका पूर्वशिक्षक एवम् विद्यालय व्यवस्थापन समितिका पूर्वअध्यक्ष समेत रहनुभएका चौलागाईंको अध्यक्षतामा नयाँ विद्यालय व्यवस्थापन समिति चयन भएको हो । अभिभावकहरु सन्तु थिङ (पाख्रिन), हेमकुमारी सञ्जेल, लक्ष्मण भट्टराई, दीलिप लोप्चन र रुक्मणि ढुङ्गाना समितिको सदस्यमा चयन हुनुभएको प्रधानाध्यापक थापाले जानकारी दिनुभयो ।
९ सदस्यीय रहने समितिको सदस्यसचिवमा विद्यालयका प्रधानाध्यापक रहनेछन् भने शिक्षकहरुको तर्फबाट एकजना शिक्षक प्रतिनिधि विद्यालयका शिक्षक तथा कर्मचारीको निर्णयबाट चयन हुनेछन् । साथै, सम्बन्धित वडाका वडा अध्यक्ष वा प्रतिनिधि पनि समितिको सदस्य रहनेछन् । कक्षा १२ सम्म पठनपाठन हुने विद्यालयमा हाल ५ सय २५ जना विद्यार्थी अध्ययनरत रहेका छन् ।
