हेटौंडाः हेटौंडा–५, सानोपोखरास्थित सिद्धार्थ शिशु सदन माध्यमिक विद्यालयमा खेलकुद कार्यक्रम सुरु भएको छ । शुक्रबार विद्यालयका प्रधानाध्यापक निर्मल पराजुलीले खेलकुद कार्यक्रमको उद्घाटन गर्नुभएको हो ।
शनिबारसम्म चल्ने खेलकुद कार्यक्रममा ब्याडमिन्टन, भलिबल, फुटबल, एल्थ्लेटिक्स, म्युजिकल चियर, स्याक रेस, चम्चा रेस, रिले, हाइजम, लङ्जम्पलगायत खेलहरु सञ्चालन हुने विद्यालयका प्रिन्सिपल पराजुलीले बताउनुभयो । सबै कक्षा र तहका विद्यार्थीको सहभागिता रहने गरी कार्यकममा मनोरञ्जनात्मक, बौद्धिक एवम् शारीरिक विकासमा सहयोग पुग्ने किसिमका खेल समावेश गरिएको छ । खेलकुदमा प्रथम, द्वितीय र तृतीय हुने विद्यार्थीलाई मेडल तथा प्रमाण–पत्र प्रदान गरिनेछ ।
विद्यालयले शिक्षासँगै खेलकुदलाई पनि अगाडि बढाउने उद्देश्यले वार्षिक क्यालेण्डरअनुसार खेलकुद कार्यक्रम आयोजना गरिएको हो । विद्यालयले हरेक वर्ष खेलकुद कार्यक्रमलाई शैक्षिक क्यालेण्डरमा नै समावेश गरेर सञ्चालन गर्दै आइरहेको छ । प्ले ग्रुपदेखि १० कक्षासम्म अध्यापन हुने विद्यालयमा ९ सय ५० जना विद्यार्थी कार्यक्रममा सहभागी हुनेछन् ।
