हेटौंडाः आइतबार हेटौंडा आउनुभएका पूर्वराजा ज्ञानेन्द्र शाहलाई स्वागत गर्न बनाइएको गेटमा लेखिएको ब्यानरप्रति बागमती प्रदेशले हस्तक्षेप गरेको छ । बागमती प्रदेशका आन्तरिक मामिला तथा कानुनमन्त्री गंगानारायण श्रेष्ठको निर्देशनमा संविधान विपरीत पूर्वराजाको स्वागतमा ब्यानर र गेट बनाइएको भन्दै प्रहरीले गेटमा लेखिएको ब्यानर सच्याउन लगाएको हो ।
पूर्वराजाको स्वागतका लागि हेटौंडा उपमहानगरपालिकाका विभिन्न स्थानमा राजावादीहरूले ‘राजा ज्ञानेन्द्र वीरविक्रम शाहदेव’ उल्लेखित स्वागतद्वार निर्माण गरेका थिए । मन्त्री श्रेष्ठले गेट हटाउन लगाउनुभएको थियो । गेट हटाउन लाग्ने क्रममा केही विवाद भएपछि राजावादीहरूले हेटौंडा–१०, भूटनदेवी मन्दिर परिसरको ब्यानरमा ‘राजा’ शब्दअघि ’पूर्व’ शब्द थपी ब्यानर राख्न दिइएको प्रहरीले जनाएको छ ।
शाह हेटौंडाको विभिन्न धार्मिक क्षेत्रहरुको अवलोकन भ्रमण तथा पूजाआराधना गरी फर्कनुभएको छ । स्वागतद्वारप्रति प्रदेश सरकारले आपत्ति जनाएको भन्दै राप्रपाका नेता तथा प्रतिनिधिसभा सदस्य दीपकबहादुर सिंहले असन्तुष्टि व्यक्त गर्नुभयो ।
