हेटौँडाः हेटौँडा उपमहानगरपालिका कप टी–२० क्रिकेट प्रतियोगिताको उपाधी ओमनगर क्रिकेट क्लबले जितेको छ । सोमबार हेटौँडा–४, हुप्रचौरमा भएको फाइनल खेलमा ओमनगर क्रिकेट क्लबले मकवानपुर क्रिकेट क्लबलाई १ विकेटले हराउँदै उपाधि जितेको हो ।
टस जितेर पहिले व्याटिङमा उत्रिएको मकवानपुर क्रिकेट क्लबले १८ ओभरमा सबै विकेट गुमाएर ७५ रन मात्रै बनाउनु सफल भयो । जवाफी व्याटिङमा उत्रिएको ओमनगरले १८ ओभरमा ९ विकेट गुमाएर लक्ष्य भेट्टायो । ओमनगर क्रिकेट क्लबको तर्फबाट ज्ञानेस सिंहले सबैभन्दा बढी १७ रन बनाएका थिए । त्यस्तै पियुस शर्माले १० रन जोडे । मकवानपुर क्रिकेट क्लबको तर्फबाट सबैभन्दा बढी सन्तोष उपाध्यायले १६ रन बनाएका थिए । रिजनले १३ रन र सुमन सुनारले ११ रन बनाएका थिए । मकवानपुर क्रिकेट क्लबको तर्फबाट रिजन ढकालले ४ विकेट, राम नरेश गिरीले ३ विकेट र साकार गजुरेलले १ विकेट लिएका थिए । ओमनगरको तर्फबाट ज्ञानेस सिंहले ३ विकेट, पिउस शर्माले ३ विकेट र असिम श्रेष्ठले १ विकेट लिएका थिए ।
म्यान अफ द म्याच ओमनगरका ज्ञानेस सिंह घोषित भए । प्रतियोगिताको उपाधी विजेता ओमनगरको टिमले १ लाख रुपैयाँ र उपविजेता मकवानपुर क्रिकेट क्लबको टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गरेका छन् । ओमनगरका ज्ञानेस सिंह प्लेयर अफ द म्याच घोषित भए । प्लेयर अफ द टुर्नामेन्ट नारायणी कलेजका सुवेन्द्र पासवान घोषित भएका छन् । उनले १० हजार रुपैयाँसहित ट्रफी प्राप्त गरे । वेस्ट व्याट्सम्यान घोषित हुँदै मकवानपुर क्रिकेट क्लबका सुमन सुनारले नगद ५ हजार रुपैयाँ र ट्रफी प्राप्त गरे । वेस्ट बलर मकवानपुर क्रिकेट क्लबका रिजन ढकाल घोषित भए ।
उदीयमान खेलाडीको रुपमा ओमनगरका गोकुल अधिकारी घोषित हुँदै नगद ५ हजार रुपैयाँसहित ट्रफी प्राप्त गरेका छन् । उदीयमान खेलाडीका लागि नगद रकम मकवानपुर जिल्ला क्रिकेट संघका पूर्वसचिव दिपेन्द्र ढकालले प्रायोजन गर्नुभएको थियो । यस्तै प्लेयर अफ द म्याच र प्लेयर अफ द टुर्नामेन्टलाई एक एक जोड गोल्डस्टार ब्राण्डको स्पोर्टस् सुज समितकृष्ण गोर्खालीले प्रदान गर्नुभयो । हेटौँडा उपमहानगरपालिकाको सहयोगमा मकवानपुर जिल्ला क्रिकेट संघले आयोजना गरेको प्रतियोगितामा १६ वटा टिमहरुको सहभागिता रहेको थियो । प्रतियोगिताको संयोजक मकवानपुर जिल्ला क्रिकेट संघका उपाध्यक्ष ईश्वरप्रसाद मैनाली हुनुहुन्थ्यो ।
मकवानपुर जिल्ला क्रिकेट संघका अध्यक्ष करण महत्राको अध्यक्षता तथा हेटौँडा उपमहानगरपालिका ४ नम्बर वडा अध्यक्ष नवीन सिग्देलको प्रमुख आतिथ्यमा पुरस्कार वितरण कार्यक्रम भएको थियो । कार्यक्रममा मकवानपुर जिल्ला खेलकुद विकास समितिका अध्यक्ष वेश खड्की, मकवानपुर जिल्ला क्रिकेट संघका निवर्तमान अध्यक्ष बासुलाल श्रेष्ठ, हेटौँडा स्कूल अफ म्यानेजमेन्टका प्रिन्सीपल पुरनबहादुर जोशीको पनि आतिथ्य रहेको थियो ।
