हेटौँडाः मादक पदार्थ सेवन गरी सादा पोशाकमा रहेका एक घुमुवा प्रहरीले अवरोध गरेपछि जिल्ला प्रहरी कार्यालय अगाडि एक महिलाको मृत्यु भएको छ । काठमाडौंमा उपचार सम्भव नभएपछि घर फर्कँदै गरेका मकवानपुरको बकैया गाउँपालिका–१, धोबीडाँडाकी मुटुरोगी ५६ वर्षीया चिरमाया लोको सोमबार बिहान करिब ४ बजेको समयमा जिल्ला प्रहरी कार्यालय अगाडि एम्बुलेन्समै मृत्यु भएको हो ।
काठमाडौंबाट लोलाई लिएर आएको परिवार र आफन्त हेटौँडा–४, रानीदरबार अगाडि काठमाडौंबाट आएको टाटासुमोलाई छाडेर अर्को टाटासुमोमा चढ्न लाग्दा मादक पदार्थ सेवन गरी मात्तिएको अवस्थामा घुमुवा सहायक प्रहरी हवलदार डिल्लीराम सिवकोटीले लोलाई लिएर आएको एम्बुलेन्स र टाटासुमोमा के गर्न लागेको भनी सोधीखोजी गर्दै हप्कीदप्की गर्न थालेपछि केहीबेर स्थिति असहज बनेको थियो ।
पेस्तोल समेत बोकेका सिवाकोटीसँग विवाद बढेपछि सुरक्षागस्तीमा खटिएको प्रहरी टोलीले मुटुरोगी लो र उनको परिवारलाई नै लिएर जिल्ला प्रहरी कार्यालय पुगेको थियो । काठमाडौंमा उपचार सम्भव नभएपछि चिरमायालाई लिएर घर फर्केका २ जना छोरा, २ जना छोरी, २ जना ज्वाइँ, श्रीमान् अर्का एक आफन्तले चिरमायालाई घर पु¥याउनै पाएनन् । अक्सिजनको अभावमा प्रहरी कार्यालय अगाडि नै चिरमायाले देह त्याग गरिन् । मादकपदार्थ सेवन गरी चिरमाया र उनका परिवारलाई अवरोध गर्ने प्रहरी सहायक हबल्दार सिवाकोटीलाई प्रहरीले उपचारका लागि भरतपुर रेफर गरेको छ ।
गृहमन्त्री हेटौँडा आएकै राती प्रहरीको अवरोधका कारण एम्बुलेन्समै विरामीको मृत्यु भएको घटनामा मकवानपुर प्रहरीले कुनै किसिमको प्रतिक्रिया दिन चाहेको छैन । उल्टै गृहमन्त्रीको सुरक्षा व्यवस्थामा व्यस्त रहेको बताइरहेको छ । बिरामीको मृत्युको घटनालाई लिएर राष्ट्रिय स्वतन्त्र पार्टी मकवानपुरले प्रहरी कार्यालयमा सोमबार ध्यानाकर्षण गराएको छ । प्रहरीले घटनालाई गुपचुप राख्ने प्रयास गरिरहेको छ ।
