हेटौँडाः हेटौँडा–११ स्थित ग्रामीण असहाय बालबालिका सामुदायिक पुनस्र्थापना केन्द्रको पन्ध्रौ वार्षिक साधारणसभा सोमबार सम्पन्न भएको छ । जोखिममा रहेका बालबालिकाको संरक्षण र शिक्षामा सहयोग गर्दै आएको केन्द्रकी अध्यक्ष सुमित्रा काफ्लेको अध्यक्षता तथा हेटौँडा उपमहानगरपालिकाकी प्रमुख मीना कुमारी लामाको प्रमुख आतिथ्यमा साधारणसभाको उद्घाटन कार्यक्रम भएको हो । कार्यक्रममा वडा अध्यक्ष जुना दाहाल, हेटौँडा उपमहानगरपालिकाको महिला तथा बालबालिका विकास महाशाखाकी प्रमुख विष्णुकुमारी लामिछानेको पनि उपस्थिति रहेको थियो ।
केन्द्रले जोखिममा रहेका २६ जना बालिका तथा किशोरीलाई आफ्नै बालगृहमा राखी उनीहरुको शिक्षा र सीप विकासमा केन्द्रले आवश्यक कार्य गर्दै आएको छ । साधारणसभामा अध्यक्ष काफ्लेले संस्थाको प्रगति प्रतिवेदन प्रस्तुत गर्नुभएको थियो । केन्द्रले मकवानपुर जिल्लाको हेटौँडा उपमहानगरपालिकासँगै बागमती, बकैया र राक्सिराङ गाउँपालिकाका बालबालिकाको शिक्षामा सहयोग गर्दै आएको छ । विद्यालय तहमा अध्ययनरत २ हजार २ सय ५२ जना विद्यार्थीलाई विद्यालय पोशाकसँगै शैक्षिक सामग्री सहयोग गर्दै आएको छ ।
केन्द्रले विद्यालयका प्रधानाध्यापक, विद्यालय व्यवस्थापन समितिका पदाधिकारी, अभिभावकका लागि विद्यार्थी सहयोग परियोजनाका बारेमा अभिमुखीकरण गरेको कार्यक्रम संयोजक केदार आचार्यले जानकारी दिनुभएको छ । साधारणसभाले सुमित्रा काफ्लेकै अध्यक्षतामा ९ सदस्यीय कार्यसमिति चयन गरेको छ । केन्द्रको उपाध्यक्षमा कृष्णगोपाल बर्तौला, सचिवमा महेन्द्र चापागाई, कोषाध्यक्षमा गुणराज पाठक, सदस्यमा प्रद्युम्न उपाध्याय, सुवाषचन्द्र कट्टेल, हरिकुमार शर्मा, प्रेमा सुवेदी र अजिता कटुवाल निर्वाचित सर्वसम्मत निर्वाचित भएका छन् ।
