हेटौँडाः हेटौँडा उपमहानगरपालिकाको ३० औं कार्यपालिका बैठक बुधबार बसेको छ । बुधबार बसेको कार्यपालिका बैठकले विभिन्न निर्णयहरु गरेको छ । उपमहानगरपालिकाको कार्यपालिका बैठकले हेटौंडा–२ स्थित सिद्धार्थ मावि परिसरको भवनमा सञ्चालनमा रहेको शिक्षा विकास तथा समन्वय इकाई खाली गराउन पत्राचार गर्ने निर्णय गरेको हेटौंडा उपमहानगरपालिकाका प्रवक्ता सविन न्यौपानेले जानकारी दिनुभयो ।
विगतमा कार्यालय सञ्चालनका लागि इकाईले लिएको भवन सिद्धार्थ माविले नै प्रयोग गर्ने मौखिक सहमति भए पनि कार्यपालिका बैठकबाट खाली गराउने निर्णय भएको हो । प्रवक्ता न्यौपानेले शिक्षा विकास तथा समन्वय इकाईको भवन खाली गराउन भनिए पनि इकाईको कार्यालयको व्यवस्थापनको विकल्प के हुने भन्ने स्पष्ट छैन । प्रवक्ता न्यौपानेले उक्त भवनमा वडा कार्यालय राख्न सकिने सम्भावना रहेको बताउनुभयो । यस्तै बैठकले आर्थिक वर्ष २०८०/०८१ को लागि कायम हुने स्थानीय दररेट विश्लेषण स्वीकृत गरेको छ । जिल्लाको दररेटअनुसार नगरमा सहज हुने तवरले दररेट स्वीकृत गरिएको न्यौपानेले जानकारी गराउनुभयो ।
नगरको बजेटबाट हुने २० लाखभन्दा बढीका परियोजनाहरुमा कन्टिन्जेन्सी (व्यवस्थापनवापत लाग्ने खर्च) २ प्रतिशत कटौती गर्ने निर्णय गरेको छ । बैठकले खर्च केन्द्रसम्बन्धी जनशक्ति व्यवस्थापनका लागि प्रतिबद्धता गर्ने निर्णय गरेको छ । कामको भुक्तानी लिन नगरपालिका नै आउनुपर्ने बाध्यता हटाउन नगरले २ वडाबापत एक लेखाको कर्मचारी पठाउने निर्णय गरेको हो ।
यस्तै, बैठकले २०७३ साल फागुनसम्मको नगरपालिकामा रहेको साविक नगरपालिकाबाट १ देखि ११ वडासम्मको सिफारिस ढड्डाहरु प्रत्येक वडामा पठाउने निर्णय गरेको छ । बैठकले नगरपालिकामा रहेका करारमा कार्यरत कार्मचारीहरुको स्थायी कर्मचारीसरह बिमा गर्ने निर्णय गरेको छ । नगरपालिकाको आवधिक योजनाको कार्यदल गठनको लागि सैद्धान्तिक सहमति भएको छ । यस्तै, बैठकले हेटौंडा उपमहानगरपालिकाका सवारी चालका सञ्जु लोप्चनको परिवारलाई ५ लाख रुपैयाँ आर्थिक सहयोग गर्ने निर्णय गरेको छ । गत साउन १४ गते उपमहानगरपालिकाको अधिकारीहरुको अवलोकन भ्रमणका क्रममा पूर्वी नेपालको इलाम जिल्लामा लोप्चनको निधन भएको थियो ।
