हेटौंडाः पुर्वी मकवानपुरको बागमती गाउँपालिका–५, सिक्रे दोभानमा पहिरोमा परी बेपत्ता भएका अर्का एक जनाको शव फेला परेको छ । बुधबार दिउँसो १ बजेर ४० मिनेटको समयमा सिन्धुलीको हरिहरपुरगढी गाउँपालिका–१ स्थित बागमती खोलाको बगरमा ६० वर्षीय अक्कल बहादुर स्याङ्तानको शव फेला परेको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिनुभयो ।
बुधबार बिहान ९ बजेर २० मिनेटको समयमा २२ वर्षीया शिला पहरीको शव फेला परेको थियो । पहिरोमा परेका ३ जना अझै बेपत्ता छन् । २५ वर्षीय जीवन पहरी, ४ वर्षीय मिलन पहरी र आन्दाजी डेढ वर्षीया दिव्या पहरीको खोजी कार्य भइरहेको छ । मंगलबार बिहान आएको पहिरोमा परी ५५ वर्षीया सन्तमाया स्याङ्तानको भने उपचारको क्रममा मृत्यु भएको थियो । यस्तै पहिरोमा परी बेपत्ता भएका १७ वर्षीय पासाङ घिसिङको भने मंगलबार दिउँसो ४ बजेतिर घाइते अवस्थामा उद्धार गरिएको थियो । घिसिङको अहिले हेटौंडामा उपचार भइरहेको छ ।
