हेटौँडाः शिक्षा नसुध्री समाजका अन्य क्षेत्र सुध्रन सक्दैन । शिक्षालाई सुधार्नु अनिवार्य छ । शिक्षा आफू सुध्रिएर समाजलाई सुधार्नु पर्छ । तर, हाम्रो समाजमा भने शिक्षा नै भद्रगोल, लथालिंग बनेको छ । सन्दर्भ गत शुक्रबारको हो । हेटौँडा उपमहानगरपालिकाको शिक्षा महाशाखाले असार १२ गते शैक्षिक सामग्री प्रदर्शनीको आयोजना गर्ने सूचना जारी गरेको थियो । प्रदर्शनीमा सहभागी हुन चाहने विद्यालयले असार १३ गते नै नाम टिपाउनु पर्ने र असार १५ गते शैक्षिक सामग्री प्रदर्शनीको आयोजना गरिने जनाइएको थियो ।
३ दिनको सूचनामा हेटौँडा–१६, हटियास्थित जनप्रिय माविमा आयोजना गरिएको प्रदर्शनीमा हेटौँडा उपमहानगरका १२ वटा विद्यालयको मात्रै सहभागिता रहेको थियो । हेटौँडा उपमहानगरमा ७३ वटा सामुदायिक र ४८ वटा निजी गरी १ सय २१ वटा विद्यालय छन् । १ सय २१ वटा विद्यालय मध्ये १२ वटा विद्यालयको मात्रै सहभागिताले नै पुष्टि गर्छ कि शैक्षिक सामग्री प्रदर्शनीको औचित्य के होला ? उपमहानगरको सामाजिक विकास समितिका संयोजक रामकृष्ण कोइरालाको वडामा भएको एक दिने कार्यक्रममा बिहान उद्घाटन र दिउँसो समापन समारोह आयोजना गर्न भने आयोजक समितिले छुटाएन ।
शैक्षिक सामग्री प्रदर्शनीमा आयोजक जनप्रिय माविसहित हेटौँडा–१८ स्थित ज्योति मावि, हेटौँडा–८ स्थित चन्द्रोदय मावि र कमाने एकेडेमी, हेटौँडा–११ स्थित हेटौँडा एकेडेमी, हेटौँडा–४ स्थित आधुनिक राष्ट्रिय मावि र नवोदय शिशु सदन, हेटौँडा–५ स्थित जीएस निकेतन, हेटौँडा–१७ स्थित बालबोध मावि, हेटौँडा–१४ स्थित जनजागृति मावि र हेटौँडा–१० स्थित ज्ञानदा माविको सहभागिता रहेको थियो ।
शैक्षिक सामग्री प्रदर्शनी भनिए पनि विद्यार्थीको परियोजना कार्य प्रदर्शनी रहेको थियो । त्यसमा पनि विद्यार्थीले निर्माण गरेका नयाँ सामग्री भन्दा पनि पुराना सामग्री प्रदर्शनीमा ल्याएका थिए । चन्द्रोदय माविमा १० कक्षामा अध्ययनरत विद्यार्थी समूहले अघिल्लो वर्ष तयार पारिएको सामग्री लिएर आएको बताए । प्रदर्शनीमा सहभागी अधिकांश सामग्री पुराना थिए । प्रदर्शनीमा नियमित शिक्षण अभ्यासमा प्रयोग हुने सामग्री प्रस्तुत गरिएको थिएन । हेटौँडा एकेडेमीका १० कक्षामा अध्ययनरत सुरज कुमार चौरसियाले ९ कक्षामा बनाएको खाद्यान्न पिन्ने मेसिन प्रदर्शनीमा राखेका थिए ।
शैक्षिक सामग्री प्रदर्शनीमा विशेषतः शिक्षकले विद्यालयमा विद्यार्थीलाई नियमित पठनपाठनको क्रममा प्रयोग गर्ने सामग्री प्रदर्शनी गरेर शिक्षकबीच नै अवलोकन र अन्तरक्रियाको अवसरका लागि उपमहानगरको शिक्षा महाशाखाले आवश्यक सहजीकरण गर्नुपर्ने थियो । एउटा विद्यालयले अभ्यास गर्दै आएको प्रक्रिया र सामग्री अर्को विद्यालयका लागि सिकाईको विषय हुन सक्थ्यो । तर, महाशाखाले असार मसान्तको चटारोमा आयोजनाका लागि मात्रै कार्यक्रमको आयोजना गरेको छ ।
शैक्षिक सामग्री प्रदर्शनीमा रोचक र प्रेरक विषय केही पनि हुन सकेन । शिक्षकले प्रदर्शनीमा आफ्नो प्रस्तुती नै राखिएको थिएन । विद्यार्थी नै आफ्नो परियोजना कार्यको व्याख्या गरिरहेका थिए । हतारमा आयोजना गरिएको, बिना तयारी नै आयोजना गरिएकै कारण प्रदर्शनीमा राम्रो गर्ने विद्यालयलाई प्रोत्साहन गर्ने कुनै पनि कार्य गरिएन । शैक्षिक सामग्री प्रदर्शनीमा सहभागी नभएका विद्यालयले अवलोकनका लागि विद्यार्थी भने पठाएका थिए । आयोजकलाई लागेको होला कि प्रदर्शनीमा अवलोकन गर्नेको भीड बढाए पुग्छ । प्रदर्शनीको उद्देश्यअनुसारका क्रियाकलापमा भने ध्यान पुग्न सकेको थिएन ।
यसअघि शिक्षक भलिबलको कार्यक्रम पनि असार दोस्रो साता आयोजना गरेको थियो । हेटौँडा उपमहानगरपालिकाको शिक्षा महाशाखाकी अधिकृत सुनिता महर्जन यसअघि नै जानकारी गराइएको र यसअघि न्यून सहभागी हुने भएकोले सञ्चालन हुन नसकेको शैक्षिक सामग्री प्रदर्शनी छोटो सूचनाको आधारमा आयोजना गरिएको बताउनुहुन्छ । शैक्षिक सामग्री प्रदर्शनी कार्यक्रमको समीक्षा गर्न सकिने उल्लेख गर्नुहुँदै सोँचे जस्तो नभए पनि आर्थिक वर्षको अन्तिममा हतारमा गरिएको उहाँले बताउनुभयो । शैक्षिक सामग्री प्रदर्शनीमा विद्यार्थी र शिक्षकको संयुक्त सहभागिता रहने गरी सहभागी हुन आग्रह गरिएको महर्जनले जानकारी दिनुभयो ।
