हेटौँडाः हेटौँडा खानेपानी व्यवस्थापन बोर्डले चरम सुख्खा मौसमको समयमा पनि दैनिक १० लाख लिटर पानीको थप स्रोत व्यवस्थापन गर्न सफल भएको छ । ३ दिनको प्रयासपछि मकवानपुरको भीमफेदी गाउँपालिका–१, भैंसेखोलाबाट दैनिक १० लाख लिटर पानी प्रणालीमा थप गर्न सफल भएको हो । पानीको चरम अभावका बेला हेटौँडा बजार क्षेत्रमा वितरण गर्नका लागि भैंसेखोला क्षेत्रमा पानीको स्रोत व्यवस्थापन गर्न सफल भएको हेटौँडा खानेपानी व्यवस्थापन बोर्डका अध्यक्ष प्रताप विष्टले बताउनुभएको छ ।
हेटौँडा बजार क्षेत्रका करिब ८ हजार धारामा दैनिक बढीमा १ घण्टामात्रै पानी वितरण हुँदै गर्दा सर्वसाधारणलाई समस्या भइरहेको बेला ३ दिनको अथक प्रयासपछि दैनिक १० लाख लिटर पानीको स्रोत सुनिश्चित गर्न सफल भएको अध्यक्ष विष्टको भनाइ छ । नेपाली सेनाको मध्यपृतना हेडक्वार्टर सुपारेटार व्यारेकसँगैको भैंसेखोलाबाट खानेपानीको स्रोत व्यवस्थापन गरिएको हो । खडेरीका कारण करिब एक सातादेखि हेटौँडा बजार क्षेत्रमा पानी वितरण गर्न समस्या भइरहेको र समस्या भएका क्षेत्रमा खानेपानीको ट्यांकरमार्फत निशूल्क पानी वितरण गर्दै आएको अध्यक्ष विष्टले बताउनुभयो ।
सोमबार साँझ ८ बजेबाट पानी वितरण सुरु भएको उल्लेख गर्नुहुँदै हेटौँडा खानेपानी व्यवस्थापन बोर्डका सूचना अधिकारी सञ्जय न्यौपानेले मंगलबार साँझसम्ममा साविककैस्वरुपमा दैनिक औसत ६ घण्टा पानी वितरण गरिने दावी गर्नुभएको छ । भैंसेखोलामा श्रोत विकास गरी पानी वितरण गर्न ६ इन्च गोलाईको पाइपलाइन करिब एक सयमिटर नयाँ व्यवस्थापन गरिएको न्यौपानेले बताउनुभयो । मनसुन सक्रियभएसँगै खानेपानीको वितरण प्रणालीमा सहज हुने अपेक्षा गरिएको छ ।
