हेटौंडाः स्वतन्त्र विद्यार्थी युनियन (स्ववियु) हेटौंडा क्याम्पसको आयोजनामा मकवानपुर जिल्लाका विभिन्न क्याम्पसमा हालै निर्वाचित स्वतन्त्र विद्यार्थी युनियन (स्ववियु) मा निर्वाचित पदाधिकारी तथा सदस्यहरुका लागि प्रशिक्षण कार्यक्रम भएको छ । विद्यार्थीको नेतृत्व तथा क्षमता विकासका लागि प्रशिक्षणको आयोजना गरिएको स्ववियु हेटौंडा क्याम्पसका अध्यक्ष अभि मैनालीले जानकारी दिनुभएको छ ।
सोमबार हेटौंडा क्याम्पसमा भएको प्रशिक्षणमा युवा अभियन्ता एवम् हेटौंडा क्याम्पसका सहायक क्याम्पस प्रमुख अर्पण पराजुलीले अबको नेतृत्व र नेतामा हुनुपर्ने गुणहरु, हेटौंडा ४ का वडा अध्यक्ष नवीन सिक्देलले स्ववियुको इतिहास र अबको स्ववियु र स्ववियुको काम तथा योग गुरु रामकृष्ण थापाले योग र योग आजको आवश्यकताका विषयमा प्रशिक्षण दिनुभएको थियो । प्रशिक्षणमा मकवानपुर बहुमुखी क्याम्पस, निर्मल बहुमुखी क्याम्पस, हटिया–जनप्रिय बहुमुखी क्याम्पस, बंशगोपाल बहुमुखी क्याम्पस, मनहरी बहुमुखी क्याम्पस र हेटौंडा क्याम्पसका स्वावियु पदाधिकारीको सहभागिता रहेको थियो ।
लामो समयपछि स्ववियु निर्वाचन भएको सन्दर्भमा निर्वाचित विद्यार्थी साथीहरुलाई स्ववियुको भूमिका र जिम्मेवारीका विषयमा जानकारी प्रदान गर्ने र सकारात्मक भूमिका निर्वाहका लागि सहयोग गर्ने उद्देश्यले प्रशिक्षणको आयोजना गरिएको हेटौंडा क्याम्पस स्ववियु अध्यक्ष अभि मैनालीले बताउनुभएको छ ।
