हेटौंडाः सामुदायिक वन उपभोक्ता महासंघ नेपाल (फेकोफन)को महाधिवेशनको तयारीमा स्थानीय तहका समुदायिक वन तयारीमा छन् । मकवानपुर जिल्लाका स्थानीय तहमा रहेका सामुदायिक वन उपभोक्ता समितिहरुबाट महासंघको प्रतिनिधि चयन गर्ने कार्य धमाधम भइरहेको हो ।
एक सामुदायिक वनबाट २–२ जना पुरुष र महिलाको सहभागिता गराइएको सामुदायिक वन उपभोक्ता महासंघ मकवानपुरका अध्यक्ष साधुराम चौलागाईंले जानकारी दिनुभयो । पालिकास्तरीय समुदायिक वन उपभोक्ता समिति निर्माणका लागि जिल्ला सामुदायिक वनमा आवद्ध भएको हुनुपर्ने व्यवस्था रहेको चौलागाईंले बताउनुभयो ।
प्रत्येक स्थानीय तहका सामुदायिक वनबाट छनोट भएर गएकामध्ये अध्यक्ष र सचिव एक जना महिला र एक जना पुरुष हुनुपर्ने वा दुबै महिला हुनुपर्ने व्यवस्था रहेको छ । यस्तै, उपाध्यक्ष र कोषाध्यक्षमध्ये पनि एक जना महिला हुनैपर्ने व्यवस्था रहेको बताइएको छ । २ जना पदेन सदस्यसमेत गरी एक स्थानीय तहमा ६ जना सदस्य रहने व्यवस्था रहेको छ । जिल्ला अधिवेशनका लागि मकवानपुरका १० वटा स्थानीय तहबाट अध्यक्ष, उपाध्यक्ष, कोषाध्यक्ष र सचिव गरी ६० जना सदस्य रहनेछन् ।
बुधबारसम्म ४ वटा स्थानीय तहमा सदस्य चयन भइसकेको बताइएको छ । गत चैत १७ गते बलराम अधिकारीको अध्यक्षतामा मकवानपुरगढी गाउँपालिकाको समिति चयन भएको छ । चैत १९ गते राजकुमार लामाको अध्यक्षतामा कैलाश गाउँपालिकामा, २० गते गणेशमान श्रेष्ठको अध्यक्षतामा थाहा नगरपालिकामा र २२ गते दलबहादुर राईको अध्यक्षतामा बागमती गाउँपालिकामा समिति चयन गरिएको चौलागाईंले जानकारी दिनुभयो । कार्यतालिका अन्तर्गत् २३ गते राक्सिराङ गाउँपालिकामा, २५ गते हेटौंडा उपमहानगरपालिका, २६ गते बकैया गाउँपालिकामा, २७ गते भीमफेदी गाउँपालिका, २८ गते इन्द्रसरोबर गाउँपालिकामा र ३० गते मनहरी गाउँपालिकामा समिति चयन गरिसक्ने उहाँले जानकारी दिनुभयो । बैशाख १२ गतेसम्म जिल्ला अधिवेशन सम्पन्न गर्ने कार्यतालिका रहेको छ । जिल्ला अधिवेशनपश्चात् प्रदेशस्तरको महाधिवेशन हुने कार्यतालिका रहेको छ ।
